У Беларусі ўжо некалькі вечароў праблемы з інтэрнэтам. Расказваем, што адбываецца
Карыстальнікі пішуць, што праблема доўжыцца дзесяць дзён.
Што адбываецца з інтэрнэтам у Беларусі?
Карыстальнікі ў розных сацыяльных сетках пішуць, што штовечар значна падае якасць інтэрнэту, прычым ва ўсіх аператараў — як у Белтэлекама, гэтак і ў A1 ды МТС.
Не ва ўсіх гэта хуткасць уласна спампоўвання, а праблемы са стратай пакетаў (Packet Loss). Гэта значыць, што частка інфармацыі не даходзіць да атрымальніка — як калі б замест цэлага ліста вы атрымлівалі яго кавалкамі і гублялі частку інфармацыі.
Нават страта адносна невялікага адсотку пакетаў можа значна ўплываць на якасць сувязі. Праз гэта, напрыклад, людзі не могуць глядзець патокавае відэа, рабіць відэазванкі ці гуляць у анлайн-гульні.
У чым можа быць прычына?
На сайце Белтэлекама размешчана аб'ява пра тое, што 29 кастрычніка адбылася DDoS-атака. А1 і Cosmos пісалі, што магчымы тэхнічныя праблемы ў вышэйстаячых правайдараў. А1 пісаў пра 30 кастрычніка, у Cosmos паведамленні пра DDoS былі 28, 29 і 30 кастрычніка.
Але гэта не тлумачыць праблемаў, якія доўжацца 10 дзён.
Праблемы з інтэрнэтам па вечарах пачалі заўважаць з 20-х чыслаў кастрычніка, яшчэ да назначэння даты выбараў. Па словах людзей, у тэхнічнай падтрымцы аператараў дапамагчы не могуць.
Ці можа гэта быць падрыхтоўкай да выбараў? Цяжка сказаць напэўна. Тэарэтычна, спецслужбы сапраўды могуць тэсціраваць ці адладжваць нейкую тэхналогію фільтрацыі трафіку, напрыклад, каб адключаць інтэрнэт у крызісных сітуацыях не цалкам, а «кавалкамі».
Але прычына можа быць і банальнай — недахоп фінансавання нейкага кавалка інфраструктуры Белтэлекама ці замена абсталявання на новае.
«Наша Нiва» — бастыён беларушчыны
ПАДТРЫМАЦЬ
Каментары
На предложение приехать тогда, когда возникла проблема, отвечают, что такого не может быть потому, что не может быть.