Кітай і Індыя часова прыпынілі закупкі расійскай нафты з пастаўкай у сакавіку на фоне росту выдаткаў на фрахт танкераў, якія не закранутыя санкцыямі ЗША, піша Радыё Свабода.
Паводле іх словаў, цана на расійскую сырую нафту ESPO, якая экспартуецца з порту Казьміна ў Ціхім акіяне, вырасла на 3—5 даляраў за бараль у параўнанні з маркай ICE Brent. Гэта звязана з рэзкім павышэннем ставак фрахту суднаў. Напрыклад, для танкера тыпу «Афрамакс» па маршруце ў Кітай яны павялічыліся «на некалькі мільёнаў даляраў».
10 студзеня ЗША ўвялі найбольш маштабны на сённяшні дзень пакет амерыканскіх санкцыяў, які закрануў даходы Расіі ад экспарту нафты і газу. Пад абмежаванні трапілі дзве з чатырох найбуйнейшых расійскіх нафтавых кампаній — «Газпрам нафта» і «Сургутнафтагаз», а таксама больш за 180 танкераў, якія, мяркуецца, перавозілі расійскую нафту і нафтапрадукты ў абыход санкцыяў заходніх краінаў. Гэтыя абмежаванні выклікалі скачок цэнаў на фрахт танкераў, бо некаторыя пакупнікі і парты ў Кітаі і Індыі адмовіліся прымаць судны, якія трапілі пад санкцыі.
Фінансавы дырэктар індыйскай кампаніі Bharat Petroleum Corp Ltd паведаміў Reuters на мінулым тыдні, што кампанія не атрымала ніякіх новых прапановаў на пастаўкі ў сакавіку, як гэта звычайна бывае ў сярэдзіне кожнага месяца, і чакае, што колькасць прапановаў на сакавік скараціцца ў параўнанні са студзенем і снежнем.
Расійская нафта складала 36% імпарту Індыі і амаль пятую частку імпарту Кітая ў 2024 годзе.
Паводле даных аналітычнай кампаніі Kpler, апошнія санкцыі закранаюць танкеры, якія перавозяць каля 42% марскога экспарту нафты Расеі, пераважна ў Кітай. ЗША запатрабавалі ад Індыі разгрузіць гэтыя танкеры з расійскай нафтай да 27 лютага і зрабіць за іх плацяжы да 12 сакавіка. У Кітаі судны, якія трапілі пад абмежаванні, сутыкаюцца са спазненнямі пры выгрузцы нафты, нягледзячы на часовую вызваленасць ад санкцый.
Паводле даных Kpler, імпарт сырой нафты з Расіі ў Кітай знізіўся да мінімуму за шэсць месяцаў на мінулым тыдні і складае 717 тысяч барэляў на дзень.
Што тычыцца Індыі, перабоі ў пастаўках расейскай сырой нафты дасягаюць 450 тысяч барэляў на суткі, адзначае Reuters. Індыйскія нафтаперапрацоўчыя заводы шукаюць альтэрнатыўныя пастаўкі з краінаў Блізкага Усходу, Афрыкі і ЗША на сакавік і красавік, бо чакаюць скарачэння паставак з Расеі, паведамляе агенцтва.
Цяпер чытаюць
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін3
Што людзі кажуць аб праездзе праз «Брузгі» і «Бераставіцу» і чаму ў апошняй стаяць па 12 гадзін
«Наіўна спадзяваліся зарабляць у Еўропах, прыязджаць дадому лячыць зубы на халяву і здаваць кватэру». Прапаганда пачала апраўдваць дарагія жыроўкі для «дармаедаў»1616
Каментары