Лідарка «Альтэрнатывы для Германіі» заявіла, што хоча добрых стасункаў з Расіяй, і назвала яе вялікай дзяржавай
«Мы хочам спыніць санкцыйную палітыку, якая, перш за ўсё, наносіць шкоду нашай краіне. У нас самыя высокія цэны на энергію ў свеце».
Лідарка нямецкай правапапулісцкай партыі «Альтэрнатыва для Германіі» Аліса Вайдэль заявіла, што хоча добрых стасункаў з Расіяй, назваўшы яе вялікай дзяржавай.
Пра гэта яна казала ў інтэрв'ю Bild. Ніжэй урывак гэтага інтэрв'ю.
Bild: У сваёй перадвыбарнай праграме вы заяўляеце, што хочаце бесперашкодна гандляваць з Расіяй, неадкладна зняць санкцыі і аднавіць газаправоды «Паўночнага патоку». Гэта азначае, што вы гатовыя пералічваць мільярды рэжыму, які зноў і зноў заклікае да вайны супраць Германіі. Вось прыклад слоў расійскага прапагандыста: «Ці не час нам зноў страсянуць пыл з тэўтонскіх магіл магутным маршам савецкага бота?» Чаму вы хочаце адпраўляць гэтым людзям нямецкія грошы?
Вайдэль: Мы хочам вельмі добрых стасункаў з нашымі еўрапейскімі суседзямі. Мы таксама хочам вельмі добрых адносін з вялікімі дзяржавамі, і да іх адносіцца Расія. < … > Да нядаўняга часу мы атрымлівалі танны газ з Расіі праз «Паўночны паток». Мы хочам спыніць санкцыйную палітыку, якая, перш за ўсё, наносіць шкоду нашай краіне. У нас самыя высокія цэны на энергію ў свеце. Мы больш не канкурэнтаздольныя.
Bild: Чаму вы, як нямецкі патрыёт, не прызнаеце, што Расія ўвесь час пагражае Германіі вайной?
Вайдэль: Мы хочам добрых стасункаў. А што рабіў нямецкі ўрад апошнія амаль тры гады ў адносінах да Расіі? Мы толькі спрыялі эскалацыі. Гэта адбывалася на ўзроўні рыторыкі, фінансавай дапамогі, а таксама паставак узбраенняў супраць Расіі. Пасля Другой сусветнай вайны нямецкія танкі зноў ідуць супраць Расіі. Гэта поўнае забыццё гісторыі, калі хочаце ведаць маё меркаванне.
Bild: Значыць, ніводнага крытычнага слова пра тое, што Расія пагражае нам вайной. Зафіксавана.
Вайдэль: Але мы ж рабілі сапраўды гэтак жа. Фрыдрых Мерц пагражаў пастаўкамі Taurus, рэкламаваў гэтую ідэю.
Bild: Але ад вас ніводнага крытычнага слова ў адрас Расіі? Зафіксавана.
Вайдэль: Так, але Дональд Трамп таксама гэтага не рабіў. Трэба садзіцца за стол перамоваў, трэба размаўляць адзін з адным. Нічога іншага «АдГ» не казала — мы павінны ўступіць у мірныя перамовы. Лічу, што толькі такая палітыка з'яўляецца сур'ёзнай. Перш за ўсё, мы павінны неадкладна спыніць санкцыйную палітыку, якая шкодзіць нам самім.
Bild: Але па-ранейшаму ні слова пра расійскія пагрозы вайны.
Вайдэль: Тры гады нямецкая ваенная рыторыка накіраваная супраць Расіі. Чаго вы чакаеце?
Цяпер чытаюць
Беларускім топ-чыноўнікам у Валгаградзе раздалі каларадскія стужкі. Марзалюк застаўся з яблыневай ФОТЫ8
Каментары