Азараў расказаў, чым будзе займацца яго дэтэктыўнае бюро «Рэкс»
Аляксандр Азараў разам з паплечнікам з «Байпола» Станіславам Лупаносавым заснавалі 24 сакавіка 2025 года ў Польшчы дэтэктыўнае агенцтва. «Белсат» даведаўся ў Азарава, з якімі запытамі туды можна ісці, ды іншыя падрабязнасці.
Поўная назва кампаніі — «Agencja detektywistyczna Reks» (Дэтэктыўнае агенцтва «Рэкс»). Журналісты цікавяцца, як прыдумвалася назва. Аляксандр Азараў кажа, гэта першая назва, якая прыйшла ў галаву, да таго ж ёсць станоўчая асацыяцыя з серыялам «Камісар Рэкс».
«Думаю, у такой справе першае, што прыйдзе на думку, — заўсёды правільнае будзе», — адзначае суразмоўца.
Дзейнасць кампаніі акрэсленая як дэтэктыўная. Гэта азначае даволі шырокі спектр паслуг. Кампанія можа выкрываць праслухоўванне ў памяшканнях, аўтамабілях і тэлефонах, кансультаваць у галіне бяспекі, прадаваць і здаваць у арэнду спецтэхніку, дзеліцца суразмоўца.
«Магчымы збор доказаў па крымінальных і грамадзянскіх справах, праверка інфармацыі, розных фактаў, пошук людзей, у тым ліку родных і продкаў. Будзем займацца і праверкай бізнес-партнёраў і патэнцыйных працаўнікоў. Яшчэ можам зрабіць абследаванне мясцовасці. У нашыя кампетэнцыі ўваходзяць і сямейна-шлюбныя справы, звязаныя з выкрыццём здрады ці апекай над дзецьмі», — працягвае суразмоўца.
Калі нас цікавіць нешта з пераліку, хоць праверка другой палавінкі, хоць бізнес-партнёра — Аляксандр Азараў запрашае карыстацца паслугамі, але іх выкананне магчымае толькі пасля заключэння афіцыйнай дамовы, падкрэслівае ён.
Ідэя адкрыць дэтэктыўнае агенцтва прыйшла таму, што большасць людзей у «Байполе» з’яўляюцца спецыялістамі ў акрэсленых справах, працягвае Азараў.
«Попыт мы яшчэ не вывучалі, але спадзяёмся, што праца ў нас будзе, бо мы першая падобная беларуская кампанія ў Польшчы, якая да таго ж можа аказваць паслугі на расейскай мове. У Польшчы мільёны ўкраінцаў і каля 300 тысяч беларусаў. Гэтыя людзі таксама патрабуюць паслуг», — расказвае ён.
Пакуль арганізацыя толькі зарэгістравалася, таму справаў, якія былі б у працы і пра якія можна было б расказаць, яшчэ няма. Таксама не з’явілася сацсетак ці сайту кампаніі.
«Было шмат адміністрацыйнай працы, каб арганізаваць дзейнасць. Гэта [рэгістрацыю. — Заўв. рэд.] заўважылі СМІ і надрукавалі гэтую інфармацыю. Дзейнасць яшчэ не пачалася, але мы можам браць на працу людзей, якія маюць досвед у правядзенні аператыўна-вышуковых мерапрыемстваў», — кажа Азараў.
Пакуль праца не пачалася, то і прайс-ліст не складалі, таму, колькі будуць каштаваць паслугі беларускіх дэтэктываў у Польшчы, суразмоўца сказаць не можа.
Цяпер чытаюць
Ад рэкету да продажу фота магіл. Як выглядае знутры групоўка Project X, якая вярбуе людзей для перавозкі мігрантаў з Беларусі ў ЕС4
Каментары