Алімпійская чэмпіёнка Надзея Скардзіна расказала парталу «Точка» пра сваё жыццё ў Швейцарыі.
«Мы цяпер жывем паміж гор. І ведаеце, па чаму я больш за ўсё сумую? Па прасторах. Вось калі едзеш па Беларусі – і над табой бязмежнае неба. Такая ж настальгія па родным Сестрарэцку і Фінскім заліве, калі неба і яшчэ мора. Проста сэрца сціскаецца ад таго, што добра», — прызналася Скардзіна.
У Швейцарыі спартсменка жыве з мужам — таксама біятланістам і мясцовым лыжнікам Марціным Егерам – і двума дзецьмі.
Сям'я алімпійскай чэмпіёнкі жыве ў невялікім пасёлку блізу швейцарскага Санкт-Галена. Галоўныя заняткі ў вольны час — паходы ў горы і спорт.
Працуе Скардзіна дзіцячай трэнеркай. Адна з праблем, з якой ёй давялося сутыкнуцца: кароткі аплачваны дэкрэтны адпачынак. Ён у Швейцарыі доўжыцца толькі тры з паловай месяцы, а далей — па рашэнні наймальніка. На два тыдні можа пайсці ў адпачынак бацька дзіцяці. Сям'і дапамагалі бабуля і дзядуля Марціна.
Нямецкую мову спартсменка ўжо ведае на ўзровень В1, хаця пачынала сваё жыццё ў новай краіне з базавага А1.
«Тут шмат дыялектаў. Вось муж, напрыклад, размаўляе на швейцарскім варыянце нямецкай мовы. Паціху трэба вучыць і гэты дыялект, каб лепш разумець адзін аднаго», — смяецца Надзея.
З вялікага спорту Скардзіна, якая мае ў сваёй скарбонцы алімпійскія золата і бронзу, сышла ў 2018 годзе. Праз год яна нарадзіла першага сына Данііла, пазней — малодшага сына Рафаэля.
У кастрычніку 2020 года Скардзіна стала 1000-й падпісанткай адкрытага ліста спартсменаў за сумленныя выбары. Яна таксама вельмі эмацыянальна адрэагавала на затрыманне Мікіты Домрачава — роднага брата сваёй сяброўкі і былой партнёркі па камандзе Дар’і.
Каментары