У Гомелі хлопец абхітрыў тэлефонных махляроў, але сам стаў фігурантам крымінальнай справы і сеў у калонію
19-гадовы гамяльчук знайшоў працу кур’ера ў тэлефонных махляроў. На першым заданні ён забраў у пенсіянеркі 9500 рублёў і павінен быў зарабіць 200 рублёў.
Махляры распавялі 85-гадовай пенсіянерцы, што яе ўнучка, якая жыве ў Расіі, трапіла ў ДТЗ, і патрэбныя грошы для кампенсацыі шкоды. У яе сапраўды ёсць унучка ў Расіі, таму жанчына сабрала ўсе зберажэнні ў рублях і валюце — атрымалася 9500 рублёў, піша belkagomel.by.
Кур’ер павінен быў перадаць гэтую суму тэлефонным махлярам, але вырашыў не дзяліцца і пакінуў яе сабе.
Але ўжо праз шэсць гадзін яго затрымалі. Да гэтага часу ў маладога чалавека засталося крыху больш за траціну ад усёй сумы. Ён патраціў грошы на два айфоны, партатыўную калонку і адзенне.
У дачыненні да затрыманага завялі крымінальную справу. Аб прысудзе суда распавяла памочніца пракурора Гомеля Алена Емяльяновіч.
— Дзеянні маладога чалавека кваліфікаваны як махлярства, здзейсненае групай асоб у буйным памеры.
Суд прыгаварыў яго да трох гадоў пазбаўлення волі з адбываннем у выпраўленчай калоніі ўзмоцненага рэжыму.
Таксама яму давядзецца вярнуць пацярпелай 6500 рублёў і кампенсаваць маральную шкоду ў памеры 4000 рублёў.
Каментары