Кіслы звальняў супрацоўнікаў «Варгеймінга», якія падтрымалі напад Расіі на Украіну
Кампанію, якая развівае гульню «Свет танкаў», прызналі ў Расіі «экстрэмісцкай». «Коммерсант» расказаў некаторыя акалічнасці, па якіх Генпракуратура РФ дабілася прызнання экстрэмістамі заснавальніка міжнароднай карпарацыі Wargaming Віктара Кіслага, а таксама ўласніка групы кампаній «Леста» Маліка Хатажаева.
Як распавядае выданне, Генпракуратура РФ устанавіла, што Кіслы, які мае грамадзянства Беларусі і Кіпра, пасля пачатку вайны «не толькі пачаў апраўдваць антырасійскую пазіцыю ўкраінскіх уладаў, але і накіроўваць прыбытак сваіх кампаній на фінансаванне Украіны».
Паводле расійскай генпракуратуры, Кіслы ініцыяваў звальненне супрацоўнікаў расійскага падраздзялення холдынгу Wargaming, якія падтрымалі вайну.
Так, у лютым 2022 года кампанія звольніла віцэ-прэзідэнта карпарацыі Сяргея Буркатоўскага пасля таго, як ён публічна выказаў падтрымку расійскаму ўварванню ва Украіну. У паведамленні ў фэйсбуку, якое пазней было выдалена, Буркатоўскі напісаў: «Аперацыю Узброеных сіл Расійскай Федэрацыі, ДНР і ЛНР падтрымліваю. Астатняе — нюансы».
Wargaming, якая мае офісы ў розных краінах, у тым ліку ў Кіеве, хутка адрэагавала на гэтае выказванне. Прадстаўнік кампаніі паведаміў, што асабістае меркаванне Буркатоўскага «катэгарычна не супадае з пазіцыяй кампаніі», і пацвердзіў, што ён больш не працуе ў Wargaming.
Па інфармацыі Генпракуратуры РФ, у 2022 годзе Віктар Кіслы падзяліў холдынг Wargaming на расійска-беларускі і міжнародны сегменты. Паводле ацэнак нагляднага ведамства, не жадаючы губляць расійскі рынак гульнявой індустрыі, ён правёў намінальную рэструктурызацыю, зрабіўшы свайго падпарадкаванага — кіраўніка санкт-пецярбургскага падраздзялення Маліка Хатажаева (ён таксама з'яўляецца грамадзянінам Кіпра) уладальнікам групы кампаній «Леста», якая належыць Wargaming Group Limited.
Нягледзячы на змену ўладальніка, «Леста», як лічаць пракуроры, працягвала кантралявацца Кіслым і прыносіць яму пастаянны прыбытак, за кошт якога, у прыватнасці, была прафінансавана дзейнасць запушчанай па ініцыятыве ўкраінскага прэзідэнта ўрадавай платформы «Юнайтэд24». Згодна з афіцыйнымі заявамі кампаніі, у 2022-2023 гадах яна як дабрачыннасць пералічыла туды $2 млн.
Цяпер чытаюць
Палітвязень расказаў, як звычайныя крымінальнікі аб’явілі галадоўку, каб палепшыць умовы ўтрымання палітычных3
Каментары