Губернатар Каліфорніі Гэвін Ньюсам запатрабаваў ад адміністрацыі прэзідэнта ЗША Дональда Трампа адклікаць загад аб размяшчэнні дзвюх тысяч вайскоўцаў Нацыянальнай гвардыі ў Лос-Анджэлесе, дзе ўспыхнулі пратэсты супраць дзеянняў міграцыйнага ведамства, назваўшы яго незаконным.
Гэта першы выпадак за апошнія дзесяцігоддзі, калі прэзідэнт заклікаў Нацыянальную гвардыю без запыту або згоды штата, піша Расійская служба Радыё Свабода.
У інтэрв'ю MSNBC Ньюсам заявіў, што плануе падаць у суд на адміністрацыю, дадаўшы, што Трамп «стварыў умовы» для пратэстаў.
«У нас не было праблем, пакуль не ўмяшаўся Трамп. Гэта сур'ёзнае парушэнне дзяржаўнага суверэнітэту — распальванне напружанасці і адток рэсурсаў адтуль, дзе яны сапраўды патрэбныя», — напісаў Ньюсам у сацсетцы X.
Пры гэтым начальнік паліцыі Джым Макдонэл заявіў на брыфінгу для СМІ ў нядзелю ўвечары, што пратэсты выходзяць з-пад кантролю, піша агенцтва Reuters. «Некалі вялікі амерыканскі горад Лос-Анджэлес быў захоплены нелегальнымі імігрантамі і злачынцамі. Цяпер натоўпы агрэсіўных мяцежнікаў нападаюць на нашых федэральных агентаў, спрабуючы спыніць нашы аперацыі па дэпартацыі, але гэтыя беззаконныя беспарадкі толькі ўмацоўваюць нашу рашучасць», — напісаў Трамп у сваёй сацсетцы Truth Social.
У нядзелю падчас пратэстаў былі затрыманыя 27 чалавек. Як піша CNN, за дзень пратэстоўцы падпалілі як мінімум два беспілотныя аўтамабілі Waymo і кідалі прадметы ў паліцэйскія машыны. Паліцыя ўжывала, у прыватнасці, слёзацечны газ і пярцовыя балончыкі для разгону натоўпу.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга146
Каментары