Беларускі святар растлумачыў, ці можна дзецям гуляць з шалёна папулярнымі монстрыкамі лабубу
Бацюшка Мікалай Ляшкевіч, які служыць ва Успенскім храме Краснаполля Магілёўскай епархіі, адказаў на пытанне, ці варта бацькам баяцца цацак лабубу. Яго думкі вас здзівяць.
Святар Мікалай Ляшкевіч актыўна вядзе свой інстаграм і мае больш за 62 тысячы падпісчыкаў. У ім мужчына простымі словамі дае адказы на самыя розныя пытанні.
Не абышоў бацюшка і такую хайповую цяпер тэму, як лялькі лабубу, якія сталі шалёна папулярнымі па ўсім свеце.
Нагадаем: лабубу — гэта папулярны персанаж з серыі дызайнерскіх цацак ад ганконгскага мастака Касінга Луна, створаны ў супрацоўніцтве з брэндам PopMart. Маленькая істота знешне падобная да зайчыка, але мае дзіўныя лапкі, шмат зубоў і выразныя вочы. Сумесь мілаты і гарэзнасці зрабіла лабубу культавым героем сярод прыхільнікаў арт-цацак і азіяцкай поп-культуры.
Каштуюць лабубу нятанна, але ж купцы гатовыя нават біцца за магчымасць набыць моднага персанажа. Сваімі лабубу ўжо пахваліліся Рыяна, Кім Кардаш'ян і Дуа Ліпа. Нават 50-гадовы Дэвід Бэкхэм прадэманстраваў у інстаграме лабубу, якую яму падарыла дачка.
Афіцыйна лабубу прадаюцца толькі ў сетцы PopMart — праз іх фірмовыя крамы, аўтаматычныя тэрміналы і сайт. У Беларусі няма афіцыйных PopMart‑крам, але ж мода на смешных монстрыкаў да нас дайшла. Лабубу ў Беларусь прывозяць баеры — у іх цацка каштуе 300 рублёў.
Сваёй калекцыяй у інстаграме ўжо пахвалілася ўладальніца прыватнага медцэнтру F-clinik Наталля Федзюковіч. Набыць монстрыка паспела і блогерка Аліна Гурская, якая робіць беларускамоўныя каверы на папулярныя песні.
Рынкі ў вялікіх і маленькіх гарадах краіны ўжо запоўнены таннымі падробкамі — там лабубу можна набыць па цане ад 10 рублёў.
У праваслаўных вернікаў магло ўзнікнуць пытанне, ці можна дазваляць дзецям гуляць з лабубу. Таму святар-блогер Мікалай Ляшкевіч вырашыў выказаць сваё меркаванне.
«Дзеці інакш успрымаюць цацкі. Тое, што дарослым здаецца страшным, дзецям здаецца нармальным ці нават сімпатычным. Даследаванні паказалі, што дзеці гуляюць з монстрамі як са звычайнымі цацкамі: клапоцяцца пра іх, кормяць і нават укладваюць спаць. Гэта дапамагае дзіцяці ўсвядоміць, што ўсе мы розныя, прыняць адрозненні і ў нейкай меры развівае цярпімасць да іншых людзей».
Святар заклікае бацькоў не баяцца монстрыкаў, а больш звяртаць увагу на тое, як дзіця гуляе з цацкай — дае ёй магчымасць быць добрай ці выкарыстоўвае як агрэсара і разбуральніка.
«Калі сцэнар зычлівы, то любы монстрык можа дапамагчы дзіцяці засвоіць свае эмоцыі. Калі сцэнарый агрэсіўны, то бацькам варта ўмяшацца, нават калі гаворка ідзе пра самую звычайную ляльку. І памятайце: калі дзіця акружана любоўю і клопатам і вядзе разам з бацькамі духоўнае жыццё, то ніводны монстр не дасць увайсці злу ў сэрца».
У здымках відэа паўдзельнічала і дачка бацюшкі, якая пяшчотна гулялася з лабубу.
За два дні ролік святара ў інстаграме набраў ужо 263 тысячы праглядаў і больш за 9 тысяч лайкаў. У каментарыях яму ў асноўным дзякуюць за такі мудры адказ.
Каментары