Час праезду беларуска-літоўскай мяжы аўтобусамі павялічыўся да 10-12 гадзін
У пункце пропуску «Каменны Лог» («Меднікі») істотна павялічыўся час перасячэння беларуска-літоўскай мяжы пасажырскімі аўтобусамі. Карыстальнікі тэматычных тэлеграм-чатаў паведамляюць, што чакаць праезду даводзіцца аж да 12 гадзін, што нетыпова для гэтага памежнага пераходу, піша «Люстэрка».
Як пішуць у тэлеграм-чатах пасажыры аўтобусаў, якія знаходзяцца на беларуска-літоўскай мяжы, час праезду ў апошнія суткі істотна вырас.
— Чакаць трэба блізу 10-12 гадзін на самой мяжы, — сцвярджае адзін з іх.
— Выехалі з Мінска рэйсавым аўтобусам «Экалайнс» а 4-й гадзіне раніцы. Цяпер 10:48, і мы ўсё яшчэ не заехалі на беларускі пункт пропуску, — піша іншы.
У чатах таксама пішуць, што праз затрымкі некаторыя пасажыры спазняюцца на запланаваныя авіярэйсы з Вільні.
— Тыя, хто спазняюцца на самалёты, спрабавалі падсесці ў аўтамабілі, але іх ніхто не ўзяў, — сцвярджае адзін з карыстальнікаў. — У аўтобусы бяруць, але гэта ўсё роўна вельмі доўга, і сэнсу ў гэтым няма.
Пасажыры ўпэўненыя, што доўгае чаканне праезду звязана з павольнай працай службаў Літвы.
— Чарга створаная штучна кіраўнікамі літоўскага пункта пропуску, — упэўненая адна з беларусак. — Не магу зразумець, як доўга яны будуць прытрымлівацца палітыкі «італьянскага страйку». Таму закладвайце час па песімістычным сцэнары.
Пасажыр аўтобуса, які выехаў з Мінска ў чацвер а 21.45 і перайшоў мяжу а 10-й раніцы пятніцы, кажа аб паглыбленых праверках памежнікаў і мытнікаў.
— Літоўскія памежнікі доўга правяралі тых, у каго былі польскія візы — ім задавалі шмат пытанняў, — паведамляе мужчына. — Мытнікі таксама даглядалі даўжэй, чым звычайна. Але прысмакі не выкідалі, толькі алкаголь і цыгарэты.
«Люстэрка» папрасіла пракаментаваць сітуацыю Службу аховы дзяржаўнай мяжы пры Міністэрстве ўнутраных спраў Літвы. Там пацвердзілі павелічэнне часу, які патрабуецца для праезду аўтобусаў у гэтым пункце пропуску (адным з двух, якія працягваюць працу, на беларуска-літоўскай мяжы).
— Апошнім часам чэргі на кантрольна-прапускным пункце «Меднікі» павялічыліся ў сувязі са зменай патоку падарожнікаў, — паведаміў дарадца аддзела камунікацый Андрус Яроцкас. — У летні сезон колькасць асоб, якія перасякаюць дзяржаўную мяжу, значна павялічылася. Акрамя таго, адзначаецца значнае павелічэнне колькасці двухпавярховых аўтобусаў. Гэтыя абставіны прыводзяць да павелічэння часу надгляду транспарту і пасажыраў.
Адзначым, што, паводле інфармацыі Дзяржаўнага памежнага камітэта Беларусі, паводле стану на 12.00 пятніцы, у пункце пропуску «Каменны Лог» (гэта значыць на беларускім баку мяжы) чакалі ўсяго чатыры пасажырскія аўтобусы.
Каментары