Лукашэнка на сустрэчы з прадстаўніком прэзідэнта ЗША прапанаваў абмеркаваць пытанне «закладнікаў»
Пытанне вызвалення шэрагу асуджаных у Беларусі асоб абмяркоўвалася на сустрэчы Аляксандра Лукашэнкі з прадстаўніком прэзідэнта ЗША Джонам Коўлам, піша БелТА.
«Слухаючы нядаўна Трампа, я так зразумеў, з вашай падачы, хутчэй за ўсё, яго вельмі хвалююць пытанні, як ён сказаў, закладнікаў або як там… Палітзняволеных і яшчэ некага…» — адзначыў ён.
— «Я не супраць. Давайце абмяркуем і гэтую тэму — так глабальна. Гэта яшчэ важна чаму — бо ў Еўропе, асабліва нашы ўцекачы (мы іх так называем), яны вельмі хочуць прычапіцца да гэтай тэмы. Ну, Крыс (намеснік памочніка дзяржсакратара ЗША Крыстафер Сміт, які таксама прысутнічаў на сустрэчы), ты гэта добра ведаеш. Я добра праінфармаваны — ты з імі вядзеш перамовы і з намі».
«Дзякуй богу. Гэта ваша справа — з кім весці перамовы. Але ў сувязі з тым, што тут шмат усялякай фальшы, я думаю, што нам варта абмеркаваць гэтую тэму, закрануць яе. Я выкажу вам сваю пазіцыю. Яна ўсім у Беларусі вядомая. Мы абсалютна не прыхільнікі таго, каб гэтыя людзі знаходзіліся ў папраўчых калоніях. Тым больш, што яны не за палітыку асуджаныя. У нас такіх артыкулаў у Крымінальным кодэксе няма. Калі Дональду цікава (мабыць, не вельмі), мы можам яму па кожным чалавеку прадставіць сутнасць ягоных правапарушэнняў і злачынстваў,» — заявіў Аляксандр Лукашэнка.
«Але я гатовы абмеркаваць гэтую тэму. І калі Дональд настойвае на тым, што ён гатовы забраць да сябе ўсіх гэтых вызваленых — Госпад з вамі — давайце паспрабуем выпрацаваць глабальную здзелку. Як любіць спадар Трамп (казаць), вялікую здзелку. Ён так гэта называе. Таму шчыра кажу — мы тут нічога не хаваем. Давайце і гэтае пытанне абмяркуем, хаця для мяне яно абсалютна не галоўнае. Ды і для вас, напэўна, таксама. Хапае ў свеце праблем,» — дадаў Лукашэнка.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары
Га?
Ну так вазьмі, задарма!
Ну не прыплачваць жа мне, каб ты іх забраў!