Увечары 22 верасня Масква трапіла пад атакі беспілотнікаў. Пра гэта паведаміў мэр сталіцы Расіі Сяргей Сабянін у сваім тэлеграм-канале.
Паводле слоў Сабяніна, сілы супрацьпаветранай абароны Міністэрства абароны Расіі збілі сем дронаў. Па папярэдняй інфармацыі, пашкоджанняў і ахвяр няма, а экстранныя службы ўжо працуюць у тых месцах, дзе зафіксавалі падзенні абломкаў.
Пазней мэр Масквы ўдакладніў, што было перахоплена яшчэ два беспілотнікі.
Жыхары Масквы і бліжэйшага Падмаскоўя паведамлялі ў сацсетках пра гучныя выбухі. Асабліва шмат сігналаў паступіла з падмаскоўных Нахабіна, Адзінцоўскай акругі, Рэутава, Зяленаграда, а таксама з маскоўскіх раёнаў Канькова, Говарава, Кузьмінкі, Чартанава, Паўднёвае Бутава, Хамоўнікі і Сколкава.
Некаторыя СМІ і тэлеграм-каналы сцвярджалі, што ў сталічных аэрапортах увялі план «Дыван», які прадугледжвае абмежаванне палётаў у выпадку пагрозы. Але афіцыйны прадстаўнік Расавіяцыі Арцём Караняка назваў гэтыя паведамленні недакладнымі і заявіў, што аэрапорты Шарамеццева, Унукава, Дамадзедава і Жукоўскі прымаюць і адпраўляюць рэйсы ў штатным рэжыме. Ён таксама адзначыў, што спецыялісты ўзмацнілі маніторынг, каб гарантаваць бяспеку цывільных палётаў.
Тым не менш, пазней усё ж было пацверджана, што ў аэрапорце Шарамеццева ўвялі часовыя абмежаванні.
У той жа час жыхароў Новай Масквы перапалохаў грузавы самалёт, які ляцеў вельмі нізка. Транспартніку, як мяркуецца, давялося ляцець на малой вышыні падчас атакі БПЛА і закрыцця аэрапорта Шарамеццева.
Міністэрства абароны Расіі сітуацыю пакуль не каментавала. Апошні раз ведамства афіцыйна паведамляла пра падобны інцыдэнт 12 верасня, калі над Маскоўскай вобласцю было перахоплена дзевяць беспілотнікаў.
Цяпер чытаюць
Расійскія прапагандысты выдумалі ўдар дрона па турыстычным аўтобусе. Але ў гісторыі ёсць загадкавыя фуры6
Каментары