Boston Dynamics пачынае серыйную вытворчасць робата-гуманоіда Atlas. Ён пойдзе працаваць на заводы Hyundai
На выставе CES 2026 кампанія Boston Dynamics зрабіла гістарычную аб'яву: знакаміты робат Atlas, які гадамі здзіўляў інтэрнэт танцамі і паркурам, нарэшце стане паўнавартасным камерцыйным прадуктам. Кампанія пачала зборку фінальнай серыйнай версіі, прызначанай для рэальнай працы на прадпрыемствах.
Пра гэта паведамляе партал Engadget, заўважыў тэлеграм-канал «Bel-Geek.com — Тэхналогіі і Навука».
Гендырэктар Boston Dynamics Роберт Плэйтэр назваў новую мадэль «найлепшым робатам, якога мы калі-небудзь стваралі». Камерцыйны Atlas спраектаваны для выканання шырокага спектра прамысловых задач, дзе патрабуецца сіла і гнуткасць.
Фінальная версія — цалкам электрычная, ад грувасткай гідраўлікі адмовіліся яшчэ ў 2024 годзе. Характарыстыкі навінкі ўражваюць: робат можа падымаць грузы вагой да 50 кг (110 фунтаў) і мае рабочы дыяпазон рук да 2,3 метра (7,5 футаў). Ён здольны працаваць аўтаномна, пад кіраваннем аператара або праз планшэтны інтэрфейс у дыяпазоне тэмператур ад -20°C да +40°C.
Хто атрымае робатаў першым?
Першым кліентам стане аўтамабільны гігант Hyundai, які валодае кантрольным пакетам акцый Boston Dynamics, і лабараторыя штучнага інтэлекту Google DeepMind.
Hyundai плануе ўкараніць Atlas на сваіх аўтазаводах у 2028 годзе. Спачатку робаты зоймуцца лагістыкай і паслядоўным сартаваннем дэталяў. Да 2030 года ім давераць больш складаныя задачы, уключаючы непасрэдную зборку кампанентаў, працу з цяжкімі грузамі і манатонныя аперацыі.
Google DeepMind атрымае робатаў для іншых мэтаў: кампанія будзе інтэграваць у сістэму Atlas свае перадавыя мадэлі штучнага інтэлекту Gemini Robotics, каб зрабіць машыну больш разумнай і здольнай да навучання.
Гісторыя Atlas пачалася яшчэ ў 2011 годзе як праект для амерыканскага вайсковага агенцтва DARPA. За 15 гадоў робат прайшоў шлях ад нязграбнай лабараторнай машыны да спрытнага электрычнага гуманоіда, гатовага замяніць чалавека на небяспечных і цяжкіх вытворчасцях.
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі16
Каментары