Блогерка добра зарабляла ў Чэхіі, але з'ехала ў Беларусь адным днём — хаваецца ад ЛГБТ
Рускамоўная блогерка перабралася з Чэхіі ў Беларусь і робіць пра гэта тыктокі. Не ўсе зразумеюць аргументы, якімі яна гэта тлумачыць.
Блогерка пад нікам black_cherry_9 падпісала свой акаўнт у тыктоку словамі «Тая, якая паехала… у Беларусь». Жанчына піша ў шапцы профіля, што зрабіла сабе такі падарунак на Новы год — адным днём перабралася ў нашу краіну.
Тыктокерка амаль нічога не расказвае пра сябе. Пра яе сям’ю вядома, што ў жанчыны ёсць муж і дачка, і што яны разам чатыры гады жылі ў Чэхіі. Адтуль у канцы снежня жанчына і пераехала ў Беларусь.
Да пераезду блогерка працавала прыбіральшчыцай па некалькі гадзін на дзень. Мяркуючы па яе расповедах, заробкі былі дастойныя:
«На прыбіранні гатэляў дзяўчаты ў Чэхіі зарабляюць больш чым на некаторых заводах, і ты не працуеш па 12 гадзін. На прыбіранні я працавала чатыры гадзіны, а не 8, 12 ці 14 гадзін».
Але ж самае цікавае — аргументы, якімі блогерка тлумачыць рашэнне пераехаць.
Дзяўчына кажа, што не заўжды рэч у грашах:
«Маёй сям’і [грошай] больш чым хапала. У нас былі нармальныя заробкі, у мужа заробак лічыўся высокім па Чэхіі — $1450-$1650, у мяне лічыўся сярэднім. Нам хапала з галавой. Мы ездзілі на новай машыне, аплачвалі свае жаданні, усе жаданні дачкі і ўсё астатняе.
Але мы з’ехалі, бо нам там не падабаецца грамадства, людзі. Мы выбралі для сябе адэкватнасць. Не заўжды фінансы — асноўнае».
У адным з першых ролікаў жанчына публікуе кадры з беларускай ежай — сыркамі, чызбургерам, стравамі нацыянальнай кухні і нават мінералкай. І суправаджае гэта такім каментаром:
«Калі агурок і памідор па смаку не быццам пластык, калі ў мандарына ёсць пах, калі харчаванне ва ўстанове — кайф для смакавых рэцэптараў, калі ў краме можна знайсці ўсё і нават болей. Гэта вам не Еўропа».
Адзін з каментатараў парыруе блогерцы, што калі краіна можа пахваліцца ежай, а не чымсьці іншым, гэта не надта добра. Жанчына адказвае ў іншым роліку — і тут яна раскрывае, што ж ёй не падабалася ў чэшскім грамадстве:
«Напэўна, трэба хваліцца ЛГБТ-супольнасцямі, наркаманіяй, якая проста паўсюль прасоўваецца. Па-вашаму, трэба хваліцца, як у ЕС, што ў школах выкладаюць гомікі ці лесбі? Гэта тое, што трэба, так?»
І гэта толькі малая частка таго, што захапляе блогерку ў Беларусі. Яна здымае прылаўкі ў краме — маўляў, такога выбару няма ні ў адной краіне Еўрасаюза.
Асобная гісторыя — тое, як жанчына гаворыць пра сталіцу Чэхіі. Яна жыла не ў Празе, а ў больш дробным чэшскім горадзе, але, кажа, і Прагу паспела пабачыць:
«Возьмем Мінск і Прагу — які чысцюткі Мінск і якая абасраная Прага».
Сваімі ролікамі блогерка здабыла сабе шмат хэйтараў. У адным з апошніх відэа яна прызнаецца, што на яе профіль пастаянна скардзяцца, асабліва на ролікі пра «прапаганду ЛГБТ у ЕС»:
«А што я кажу не так? Што ў школах выкладчыкі ЛГБТ? Што ў дзяцей у ЕС ёсць пэўныя ўрокі, дзе ім расказваюць — маўляў, ты можаш выбраць, кім ты будзеш, хлопчыкам ці дзяўчынкай, або проста «яно», ці аўтобусам, напрыклад — чаму б і не! Для мяне гэта не норма, я б не хацела, каб маё дзіця вучылася там».
«Наша Нiва» — бастыён беларушчыны
ПАДТРЫМАЦЬ
Каментары