Кіраўнік Башкартастана Радзій Хабіраў паведаміў у сваім тэлеграм-канале, што гэты расійскі рэгіён плануе прывезці з Беларусі яшчэ 9 зуброў. Яны будуць каштаваць 10,2 мільёна расійскіх рублёў (каля 379 тысяч беларускіх). На гэтыя грошы Дырэкцыя па прыродных тэрыторыях пад асаблівай аховай рэспублікі купіць жывёл для развядзення.
Хабіраў падкрэсліў, што праект не носіць забаўляльнага характару, а служыць важнай дзяржаўнай задачы — захаванню біялагічнай разнастайнасці. Са слоў чыноўніка, праз гэтую акцыю Башкартастан «аддае даўгі прыродзе». Ён дадаў, што ўмовы ў рэспубліцы для развядзення зуброў вельмі спрыяльныя.
Праект развядзення белавежскіх зуброў у Башкартастане вядзецца з 2023 года. На сёння колькасць жывёл дасягнула 25 галоў, у тым ліку 8 цялят, якія нарадзіліся ўжо ў рэспубліцы. Мясцовыя ўлады спадзяюцца, што да 2030 года колькасць зуброў павялічыцца да 50 асобін.
Каментары