У Мінску таксіст распыліў газ у твар удзельніку ДТЗ, які не вызваліў яму дарогу
На міліцэйскую лінію «102» звярнуўся 26‑гадовы жыхар сталіцы і паведаміў, што невядомы распыліў яму ў твар пярцовы балончык. Як высветлілася, перад тым мужчына трапіў у дарожна-транспартнае здарэнне і афармляў еўрапратакол. З-за гэтага ён не мог прыбраць з праезнай часткі свой грузавік МАЗ, і гэта прадвызначыла наступныя падзеі.
У гэты час побач праязджаў аўтамабіль таксі. Яго кіроўца ў грубай форме запатрабаваў вызваліць дарогу. Калі патрабаванне не было выканана, таксіст спачатку адвёз куды трэба свайго пасажыра, а пасля вярнуўся да месца ДТЗ, падышоў да кіроўцы грузавіка, распыліў яму ў твар газ і паехаў далей.
Супрацоўнікі міліцыі ўстанавілі асобу падазраванага па прыкметах і затрымалі 46‑гадовага таксіста, жыхара Мінскага раёна.
У дачыненні да яго распачатая крымінальная справа за хуліганства. Мужчыну пагражае да трох гадоў пазбаўлення волі.
Дэпутатка, якая рыхтуе прыгажунь для Лукашэнкі, выйшла замуж23
Каментары