Трамп у звароце да нацыі паабяцаў вельмі хутка скончыць вайну з Іранам
«Мы вернем іх у каменны век, дзе ім месца», — дадаў ён.
Прэзідэнт ЗША Дональд Трамп выступіў з тэлевізійным зваротам да нацыі, у якім так і не адказаў на пытанне, калі скончыцца вайна Злучаных Штатаў і Ізраіля з Іранам, якая пачалася больш за месяц таму. Трамп толькі зноў паўтарыў думку пра тое, што баявыя дзеянні блізкія да завяршэння, і чарговы раз прыстрашыў Тэгеран «надзвычай моцным ударам», піша Бі-бі-сі.
Трамп сказаў, што амерыканскія вайскоўцы амаль выканалі пастаўленыя перад імі задачы ў вайне з Іранам і што канфлікт хутка скончыцца.
«Мы збіраемся скончыць працу, і мы збіраемся скончыць яе вельмі хутка. Мы вельмі блізкія да мэты», — заявіў ён.
Амерыканскі прэзідэнт зноў паўтарыў словы пра тое, што ЗША знішчылі ваенна-марскі флот і ваенна-паветраныя сілы Ірана, а таксама паралізавалі яго праграмы балістычных ракет і ядзерную зброю. Паводле яго слоў, удары будуць працягвацца на працягу наступных двух-трох тыдняў.
«Сёння ўвечары я рады паведаміць, што гэтыя асноўныя стратэгічныя задачы блізкія да завяршэння», — сказаў Трамп у сваім 19‑хвілінным звароце.
Ён таксама паўтарыў думку пра тое, што не ЗША, а іншым краінам патрэбен Армузскі праліў, які ўжо месяц фактычна блакуе Тэгеран. Самая складаная частка працы зроблена, і калі канфлікт скончыцца, праліў адкрыецца натуральным чынам, сцвярджае Трамп.
«Мы збіраемся нанесці ім надзвычай моцны ўдар на працягу наступных двух-трох тыдняў. Мы вернем іх у каменны век, дзе ім месца», — дадаў ён.
Рост цэн на паліва ў сувязі з вайной Трамп назваў «кароткатэрміновым»: «Многія амерыканцы занепакоеныя нядаўнім ростам цэн на бензін тут, дома. Гэты кароткатэрміновы рост стаў вынікам таго, што іранскі рэжым здзейсніў шалёныя тэрарыстычныя атакі супраць камерцыйных нафтавых танкераў краін, якія не маюць ніякага дачынення да канфлікту».
Біржавыя курсы ўпалі, даляр умацаваўся, а цэны на нафту зноў выраслі пасля таго, як прэзідэнт ЗША заявіў, што «асноўныя стратэгічныя мэты» Вашынгтона ў іранскай вайне блізкія да завяршэння, але не назваў дакладных тэрмінаў завяршэння канфлікту, піша Reuters.
Прэзідэнт ЗША ўжо не першы раз анансуе хуткае завяршэнне вайны з Іранам, якую Злучаныя Штаты і Ізраіль пачалі 28 лютага. «Мы вельмі хутка сыдзем», — казаў ён журналістам у аўторак. Паводле яго слоў, гэта можа адбыцца на працягу «двух тыдняў, можа быць, трох».
У сераду Трамп заявіў, што Іран звярнуўся да ЗША з просьбай аб спыненні агню і што ён разгледзіць гэтае пытанне толькі ў выпадку адкрыцця Армузскага праліва. Міністэрства замежных спраў Ірана ў адказ назвала заяву Трампа ілжывай.
Крыніцы Axios паведамлялі, што магчымасць спынення агню ў абмен на адкрыццё праліва абмяркоўвалася, але пры гэтым засумняваліся сказаць, наколькі такая здзелка рэальная. Яшчэ ў аўторак Кітай і Пакістан прадставілі мірную ініцыятыву ў гэтым кірунку.
Іран паслядоўна адмаўляе правядзенне якіх-небудзь прамых перамоў з Вашынгтонам. Прадстаўнік МЗС Ірана Эсмаіл Багаі называў заяву Трампа «ілжывай і беспадстаўнай».
Выданне Axios меркавала, што Трамп, магчыма, меў на ўвазе заяву прэзідэнта Ірана Масуда Пезешкіяна, зробленую ў аўторак падчас тэлефоннай размовы са старшынёй Еўрасавета Антоніу Коштай. Згодна з паведамленнямі іранскіх СМІ, Пезешкіян заявіў яму, што Іран гатовы спыніць вайну, але толькі калі ЗША спыняць свае атакі, а Іран атрымае гарантыі прадухілення аднаўлення баявых дзеянняў.
«Новы прэзідэнт Ірана, значна менш радыкалізаваны і значна разумнейшы за сваіх папярэднікаў, толькі што папрасіў Злучаныя Штаты Амерыкі аб спыненні агню! Мы разгледзім гэтае пытанне, калі Армузскі праліў будзе адкрыты, вольны і свабодны», — пісаў Трамп у сераду ў Truth Social. Паводле яго слоў, пакуль Тэгеран не пойдзе на саступкі, ЗША будуць працягваць «разносіць Іран у пух і прах».
Пезешкіян быў абраны прэзідэнтам Ірана ў ліпені 2024 года.
Трамп неаднаразова заяўляў, што вайна скончыцца на працягу двух-трох тыдняў, а напярэдадні, адказваючы на пытанні журналістаў, ён упершыню дапусціў, што ЗША спыняць атакі на Іран без здзелкі з Тэгеранам.
Злучаныя Штаты даволі хутка завершаць вайну з Іранам і могуць вярнуцца для «кропкавых удараў», калі спатрэбіцца, заявіў Трамп агенцтву Reuters у сераду за некалькі гадзін да запланаванага звароту да нацыі. Ён таксама сказаў, што ў сваёй прамове заявіць аб магчымасці выхаду ЗША з НАТА, пра што ён раней разважаў у інтэрв'ю выданню Telegraph.
У выніку ў тэлезвароце да нацыі Трамп не стаў наўпрост абмяркоўваць НАТА.
Цяпер чытаюць
Лукашэнка выказаўся пра дэфіцыт медыкаў і прапанаваў ім працаваць больш4
Каментары