Аб'яднанне былых сілавікоў BELPOL апублікавала маштабнае расследаванне пра сетку беларускіх спецслужбаў за мяжой, выявіўшы больш за сто супрацоўнікаў КДБ і ГРУ, што працуюць пад дыпламатычным прыкрыццём у амаль сарака краінах свету.
Прадстаўнікі BELPOL сцвярджаюць, што частка апублікаваных звестак адносіцца да 2024—2025 гадоў і атрымана з унутраных крыніц. Агулам у матэрыяле названа каля шасцідзесяці меркаваных разведчыкаў і апісаны метады іх укаранення ў сістэму Міністэрства замежных спраў, пераказвае расследаванне партал «Люстэрка».
Паводле версіі аб'яднання, уся гэтая дзейнасць каардынуецца праз Упраўленне дыпламатычнай бяспекі МЗС. Яго начальнікам названы Усевалад Глушкоў, які раней удзельнічаў у дыпламатычных місіях у Літве, Латвіі, Польшчы і Францыі. Сярод кіраўнікоў падраздзялення таксама згадваюцца намеснік начальніка ўпраўлення Андрэй Швец, які нібыта працаваў пад прыкрыццём у Літве, Германіі і Польшчы, загадчык сектара ўласнай бяспекі Алег Буйкевіч і кіраўнік сектара спецыяльнай сувязі Віктар Каменеў.
Расследавальнікі адзначаюць, што частка супрацоўнікаў укараняецца ў сістэму МЗС яшчэ ў маладым узросце і будуе кар'еру як звычайныя дыпламаты. Іншыя ж пераходзяць у дыпламатычныя структуры пасля некалькіх гадоў службы ў КДБ ці ГРУ, атрымліваючы пасады дарадцаў, сакратароў, аташэ або супрацоўнікаў консульстваў. Некаторыя карыстаюцца спецыяльнымі пашпартамі з выдуманымі імёнамі і біяграфіямі. Адна з найбуйнейшых груп, як гаворыцца ў матэрыяле, была выяўлена ў Бельгіі, дзе знаходзяцца штаб-кватэры Еўрасаюза і НАТА. Паводле дадзеных BELPOL, у яе ўваходзяць дарадца Павел Гур'янаў, аташэ па пытаннях абароны Дзмітрый Лука, першы сакратар Дзмітрый Крышталь і аташэ Сяргей Арцем'еў. Пры гэтым Гур'янаў нібыта выкарыстоўваў пашпарт прыкрыцця на імя «Павел Карчагін».
Асобная ўвага ў расследаванні ўдзелена ўкраінскаму напрамку. Сцвярджаецца, што да эвакуацыі пасольства Беларусі ў Кіеве ў 2022 годзе там дзейнічала паўнавартасная група супрацоўнікаў спецслужбаў. Сярод іх названыя дарадца пасольства Уладзімір Зубкоў, ваенны аташэ Ігар Шматок, памочнікі ваеннага аташэ Яўген Касавец і Віталь Мельнікаў, першы сакратар Дзмітрый Пралюб і афіцэр-шыфравальнік Эдуард Долмат. Аўтары расследавання мяркуюць, што гэтая каманда магла працаваць не толькі ў інтарэсах Мінска, але і на карысць расійскіх спецслужбаў.
Пры гэтым найбуйнейшая сетка беларускіх агентаў пад дыпламатычным прыкрыццём, паводле версіі BELPOL, дзейнічае зусім не ў Еўропе ці ЗША, а ў Расіі. У адрозненне ад заходніх краін, дзе гаворка ідзе пра некалькіх супрацоўнікаў у асобных прадстаўніцтвах, у Расіі іх налічваюцца дзясяткі. Яны працуюць як у пасольстве ў Маскве, так і ў генеральных консульствах у Растове-на-Доне, Краснадары, Ніжнім Ноўгарадзе і іншых расійскіх гарадах. Такі маштаб прысутнасці тлумачыцца цесным супрацоўніцтвам дзвюх краін у сферы бяспекі і абароны.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію88
Каментары
пра гэта кожны сабака ведае .
а тое што белпол адводзіць удар ад сябе , гэта факт