У некаторых гарадах складана зняць кватэру надоўга праз наплыў расійскіх турыстаў

Паколькі ў абласных гарадах «Куфар» як пляцоўка для арэнды папулярнейшы за «Рэалт», прычым па некаторых пазіцыях у 3—4 разы (для Мінска адрозненне не такое істотнае), для аналізу будзем абапірацца менавіта на «Куфар».

Мінск

Цяпер на 1866 кватэр, якія здаюць у Мінску на доўгі тэрмін, існуе 1465 пасутачных прапаноў.

Атрымліваецца, што ў сталіцы хоць і з невялікім адрывам, але дамінуе доўгатэрміновая арэнда. У пераліку на колькасць насельніцтва выходзіць адна прапанова на 1070 жыхароў.

Што да кватэр, якія здаюць пасутачна, то тут атрымліваецца адна кватэра на 1365 жыхароў.

Брэст

У Брэсце на працяглы тэрмін цяпер здаюць 296 кватэр, ці адну кватэру на 1170 жыхароў. Гэта робіць Брэст антылідарам па колькасці кватэр, якія здаюць у доўгатэрміновую арэнду з улікам насельніцтва горада.

Колькасць кватэр, якія здаюць пасутачна ў Брэсце, значна перавышае доўгатэрміновыя — 551 прапанова. Ці па адной кватэры на 679 жыхароў.

Віцебск

У Віцебску на доўгі тэрмін здаюць 351 кватэру, што складае па адной кватэры на 1020 жыхароў. На кароткі тэрмін у Віцебску здаецца 288 кватэр, ці па адной кватэры на 1242 жыхара.

Павялічыць

Гомель 

У другім па колькасці насельніцтва горадзе Беларусі ў доўгатэрміновую арэнду здаюць 472 кватэры, ці па адной прапанове на 1059 жыхароў. Што да кароткатэрміновых, то іх яшчэ менш, чым у Віцебску — усяго 268 прапаноў, ці па адной кватэры на 1865 жыхароў.

Гродна

У Гродне на працяглы тэрмін цяпер здаецца 319 кватэр, ці па адной кватэры на 1143 жыхароў. Што тычыцца пасутачнай арэнды, то такіх прапаноў нашмат больш — 660, або па адной кватэры на кожныя 552 жыхары. Гэта робіць Гродна лідарам па колькасці пасутачных кватэр на душу насельніцтва. 

Магілёў 

У Магілёве цяпер здаюць 297 кватэр на доўгі тэрмін і 257 пасутачна. Гэта па адной кватэры на 1188 і 1373 жыхароў адпаведна.

Пра што сведчаць такія лічбы?

У турыстычных Гродне і Брэсце рынак пасутачнай арэнды жытла куды больш развіты, чым у трох іншых гарадах на ўсходзе краіны, бо і адпачываць сюды прыязджае больш народу.

Але для тых, хто жыве ў гэтых гарадах і хоча арандаваць кватэру на доўгі час, гэта ўскладняе пошукі. Бо становіцца менш даступнага арэнднага жытла, у тым ліку праз больш высокія стаўкі. Асабліва калі размова ідзе пра цэнтральную частку горада, дзе традыцыйна любяць спыняцца турысты.

Напрыклад, калі параўноўваць арэндныя стаўкі на двухпакаёўкі, якія здаюць на працяглы тэрмін у Брэсце і Магілёве, то заўважна розніца ў прыкладна 80 даляраў.

Павялічыць

Развіты рынак пасутачнай арэнды ў заходніх абласных цэнтрах моцна адбіваецца на колькасці прапаноў па здачы аднапакаёвак.

Напрыклад, калі ў Віцебску цяпер здаюць 174 аднапакаёвыя кватэры, то ў Гродне — усяго 101. Розніца ў цэнах — каля 70 даляраў.

Павялічыць

А калі разглядаць менавіта цэнтральную частку Гродна, то аднапакаёвак на доўгі тэрмін там вельмі мала, а тое, што ёсць, ацэньваюць у 425—460 даляраў за месяц.

Праз гэта ў тым жа Трэдсе нярэдка можна сустрэць допісы, дзе людзі скардзяцца на высокія цэны і нізкі выбар жытла ў доўгатэрміновую арэнду ў Брэсце і Гродне.

• 0
• 0
• 0
• 0
• 0
• 0
• 0
• 0