У Расіі чакаюць звальнення Набіулінай ды Мішусціна і пераходу да «мабілізацыйнай эканомікі»

Тэлеграм-канал «Можем объяснить» са спасылкай на крыніцы, блізкія да Цэнтрабанка і адміністрацыі прэзідэнта, сцвярджае, што Эльвіра Набіуліна разглядае магчымасць пакінуць пасаду кіраўніцы Цэнтрабанка, якую займала з 2013 года.

Паводле слоў крыніц тэлеграм-канала, Набіуліна нібыта незадаволеная курсам Крамля: яна згодная дапрацаваць да канца свайго тэрміну ў 2027 годзе, але не гатовая выконваць функцыі ў выпадку ўвядзення ваеннага становішча, закрыцця межаў і г. д. Адсутнасць Набіулінай на Пецярбургскім міжнародным эканамічным форуме называюць «дыпламатычнай хваробай»: яна «праінфармавала правадыра, дыпламатычна захварэла і чакае яго адказу».

Адначасова з'явіліся чуткі пра магчымую будучую адстаўку ўрада Міхаіла Мішусціна, які займае прэм'ерскую пасаду з 2020 года. Тыражуецца версія, што Мішусціна можа змяніць Андрэй Белавусаў — цяпер міністр абароны, а раней памочнік прэзідэнта па эканоміцы.

Прыхільнік логікі «абкладзенай крэпасці» і дзяржпланавання, Белавусаў успрымаецца як чалавек мабілізацыйнага падыходу, здольны ўпісацца ў логіку эканомікі працяглага супрацьстаяння. Палітолаг Ілья Грашчанкоў сцвярджае:

«Але яго перавод у прэм'еры азначаў бы не проста кадравую перастаноўку, а значна больш сур'ёзны сігнал: дзяржава гатовая пераходзіць ад мадэлі адаптацыі да мадэлі жорсткай мабілізацыйнай эканомікі».

Па сутнасці, гаворка ідзе пра мандат урада на новую эканамічную сістэму — умоўны Дзяржплан, эканоміку вайсковага заказу, ручное размеркаванне рэсурсаў і прыярытэт прамысловай мабілізацыі.

Чуткі пра адстаўку ўрада «варта ўспрымаць менавіта як чуткі», падкрэслівае Грашчанкоў: «Гэта адлюстраванне нервовасці эліт вакол стану эканомікі». Хоць сам сцэнарый адстаўкі ўрада эксперт не лічыць «фантастычным»: Крэмль можа пайсці на гэта, каб зняць назапашанае раздражненне грамадства, якое незадаволенае інфляцыяй, абмежаваннямі і блакіроўкамі інтэрнэту.

Што тычыцца Набіулінай, то яна зыходзіць з таго, што ў 2027 годзе пакіне пасаду кіраўніцы ЦБ, казаў раней выданню The Bell яе знаёмы. У наступным годзе скончыцца трэці і апошні па законе тэрмін паўнамоцтваў Набіулінай, хоць пры жаданні заканадаўства можна і памяняць дзеля яе чацвёртага тэрміну, казалі крыніцы The Bell.

«Сама Набіуліна хоча на волю, але пачуцці ў яе змешаныя», — сцвярджаў адзін з суразмоўцаў выдання.

Паводле даных The Bell, замяніць Набіуліну могуць намеснік кіраўніка адміністрацыі прэзідэнта Максім Арэшкін, кіраўнік банка ВТБ Андрэй Косцін альбо кіраўнік Прамсувязьбанка Пётр Фрадкоў, хоць прадметных абмеркаванняў новай кандыдатуры яшчэ не было.

• 1
• 1
• 13
• 1
• 3
• 1
• 0
• 1