У Беларусі КДБ затрымаў расійскага бізнэсмена, якога ў Расіі шукалі за пастаўкі няякаснай тушонкі для арміі
Расійскага бізнэсоўца ў нашай краіне адсачылі па тэлефонных перамовах і вулічных відэакамерах.
Супрацоўнікі КДБ затрымалі ў Беларусі бізнэсмена Дзмітрыя Мiзгiра, які тры месяцы знаходзіўся ў расійскім вышуку. Затрыманне адбылося пасля таго, як мужчына паспрабаваў выехаць праз Беларусь за мяжу.
Яго адсачылі па тэлефонных перамовах і вулічных камерах відэаназірання. Мужчыну ўжо перадалі Расіі.
Мiзгiра абвінавачваюць у махлярстве ў асабліва буйным памеры ў складзе групы. Яго лічаць ключавым сувязным у схеме паставак 170 тон няякасных мясных кансерваў у зону «СВА». Агульная шкода ацэньваецца ў 700 мільёнаў расійскіх рублёў (8,6 млн даляраў).
Кансервы вырабляліся на камбінаце «Сяляціна» пад Масквой. Замест належнага мяса ў іх клаліі абрэзкі свіных туш, шпік і забароненыя харчовыя дабаўкі.
Паводле версіі следства, ён быў пасрэднікам паміж вытворцамі і Мінабароны РФ. Праз Мiзгiра перадаваліся хабары (па 5 расійскіх рублёў з кожнай банкі тушонкі, усяго на суму каля 120 тысяч даляраў).
Мiзгiру пагражае да 10 гадоў пазбаўлення волі па артыкуле пра махлярства (і да 15 гадоў, калі абвінавачанне перакваліфікуюць на хабарніцтва). Сам ён віны не прызнае.
У вышуку па гэтай справе застаюцца яшчэ два чалавекі — гендырэктар камбіната «Сяляціна» Арцём Барышкоў і тэхнолаг Зінаіда Грышчук.
Каментары