Галоўны памежнік Латвіі: Тунэлі на мяжы дакладна капалі з ведама беларускіх службаў
Кіраўнік Дзяржаўнай памежнай службы Латвіі Гунціс Пуятс заявіў, што абодва выяўленыя падземныя тунэлі на латвійска-беларускай мяжы, якімі мігранты карысталіся для нелегальнага трапляння ў Латвію, былі пабудаваныя не без ведама беларускіх службаў.
Па словах латвійскага службоўца, асабліва грунтоўным быў другі тунэль, знойдзены ў жніўні ў Краславе. Яго даўжыня складала не менш за 30 метраў, вышыня і шырыня — каля 80 сантыметраў. Для ўмацавання выкарыстоўваліся спецыяльныя апоры і фанернае перакрыцце. Пры будаўніцтве было вынесена каля 28 кубаметраў грунту.
Пуятс мяркуе, што з беларускага боку за работамі маглі сачыць назіральнікі або тэхнічныя сродкі, у тым ліку цеплавізары. Яны маглі папярэджваць будаўнікоў, калі да месца набліжаліся латвійскія памежнікі.
Кіраўнік памежнай службы заявіў, што Латвія ўжо чакае з'яўлення наступнага тунэля. Паводле атрыманай інфармацыі, на беларускім баку зноў могуць весціся падземныя работы, хоць дакладнае месца пакуль невядомае.
У Латвіі да гэтага часу знайшлі толькі два такія тунэлі, у той час як у Літве — ужо 12. Латвійскія памежнікі лічаць, што ў абодвух сваіх выпадках парушальнікаў затрымалі адразу падчас першага выкарыстання тунэляў.
Пуятс таксама адзначыў, што сёлета доля затрыманых парушальнікаў мяжы, паводле папярэдняй ацэнкі, магла знізіцца да 90%. Пры гэтым Латвія стала адным з асноўных кірункаў для нелегальнай міграцыі, а падтрымка Узброеных сіл краіны для памежнікаў істотна павялічылася толькі са жніўня.
Латвійская памежная служба таксама хацела б прыцягваць да аховы мяжы маладых людзей, якія праходзяць Дзяржаўную службу абароны. Гэта магло б даваць памежнікам каля 100 дадатковых чалавек у год, аднак пакуль дамовіцца з Міністэрствам абароны і Узброенымі сіламі адносна гэтага не ўдалося.
У Латвіі на мяжы з Беларуссю знайшлі адзін падземны тунэль для нелегальных мігрантаў
Frontex: Тунэлі мігрантаў на беларускай мяжы будуюцца з ведама і пры падтрымцы ўладаў Беларусі
У Латвіі знайшлі першы ў краіне тунэль для нелегальных мігрантаў з Беларусі
На мяжы быў паранены літоўскі памежнік, мігранты спрабавалі зацягнуць яго ў Беларусь
Цяпер чытаюць
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі77
Каментары