Падставай стала смерць 28‑гадовай супрацоўніцы Іркуцкага супрацьчумнага інстытута. Яна разбіла прабірку з узбуджальнікам лёгачнай чумы.
Адміністрацыя Дональда Трампа сочыць за сітуацыяй вакол магчымага выпадку лёгачнай чумы ў Іркуцкай вобласці, піша Axios са спасылкай на амерыканскага чыноўніка.
«Адміністрацыя ведае пра сітуацыю, сочыць за ўспышкай і ацэньвае магчымыя варыянты дзеянняў», — сказаў суразмоўца выдання.
Паводле расійскіх медыя, 25 верасня 28‑гадовая супрацоўніца Іркуцкага супрацьчумнага інстытута Дар’я Шыпілава разбіла прабірку з узбуджальнікам лёгачнай чумы. Праз некалькі дзён яе шпіталізавалі з цяжкай пнеўманіяй, а ў ноч на 2 кастрычніка яна памерла.
Пасля гэтага ў некалькіх медыцынскіх установах увялі каранцінныя меры, а амаль 200 чалавек, якія маглі кантактаваць з жанчынай, узялі пад назіранне. Паводле губернатара Іркуцкай вобласці Ігара Кобзева, прыкмет захворвання ў іх няма, тэсты далі адмоўныя вынікі.
Расійскія органы аховы здароўя не пацвердзілі, што Шыпілава хварэла на чуму. Расспажыўнагляд назваў прычынай яе смерці «пнеўманію нявысветленай этыялогіі» і заявіў, што аналізы не выявілі мікраарганізмаў, звязаных з яе працай. Эпідэміялагічную сітуацыю ў рэгіёне ведамства называе стабільнай.
Каментары