Пад Брэстам кітайцы будуюць цяпліцу, дзе за агуркамі і памідорамі будзе сачыць штучны інтэлект
Цяпліцу пятага пакалення плошчай 1,6 гектара плануюць узвесці да канца 2026 года.
Новую цяпліцу будуюць на тэрыторыі камбіната «Берасце» ў Брэсцкім раёне, паведамляе БелТА. Праект рэалізуюць разам з кітайскімі партнёрамі паводле пагаднення, падпісанага ў снежні 2025 года ў Шанхаі.
Кампанія, якая перамагла ў тэндары, ужо выйшла на пляцоўку і пачала падрыхтоўчыя работы. Абсталяванне адправілі з Кітая.
«Падрадчыкі гарантуюць укласціся ў тэрміны. Аднак ёсць асцярогі наконт таго, як абсталяванне пройдзе межы. Калі праблем не будзе, то да канца гэтага года абяцаюць пабудаваць цяпліцу», — расказаў старшыня Брэсцкага райвыканкама Рыгор Панасюк.
Штучны інтэлект будзе сачыць за ростам раслін, тэмпературай і іншымі паказчыкамі. Праграмнае забеспячэнне стане кіраваць сістэмамі, якія падаюць раслінам неабходныя рэчывы, а таксама дадатковым асвятленнем.
У цяпліцы плануюць круглы год вырошчваць агуркі і памідоры. Аўтаматызацыя дазволіць атрымліваць больш прадукцыі з кожнага квадратнага метра і знізіць выдаткі.
Цяперашняе будаўніцтва — пробны этап праекта. Калі ён будзе паспяховым, цяплічны комплекс могуць пашырыць яшчэ на 10 гектараў. На трэцім этапе разглядаецца далучэнне пляцоўкі да свабоднай эканамічнай зоны «Брэст».
Герой Беларусі Марына Васілеўская нарадзіла дачку ад касманаўта Алега Навіцкага16
Каментары