У Германіі робат чапіўся да 16‑гадовай дзяўчыны. Хто будзе пакараны?
У нямецкім Кёльне паліцыя расследуе незвычайны выпадак: чалавекападобны робат дакранаўся да маладой дзяўчыны і імітаваў сэксуальныя рухі. Здарэнне транслявалі ў сацсетках. Цяпер паліцыя высвятляе абставіны здарэння і ролю людзей, якія суправаджалі робата.
Як паведамляе паліцыя Кёльна, незвычайнае здарэнне адбылося позна ўвечары 10 кастрычніка каля рэстарана хуткага харчавання ў цэнтры горада. 16‑гадовая дзяўчына знаходзілася там з сяброўкамі, калі да яе ззаду наблізіўся робат вышынёй каля 120 сантыметраў. Ён дакрануўся да ягадзіц дзяўчыны, а затым зрабіў «штурхальныя рухі ў бок яе ягадзіц».
Здарэнне здымалі на відэа і транслявалі ў жывым эфіры ў сацсетках 16‑гадовы ўладальнік робата і яго 19‑гадовы спадарожнік, суправаджаючы трансляцыю непрыстойнымі каментарамі.
Дзяўчына паведаміла пра здарэнне ў паліцыю. Неўзабаве праваахоўнікі знайшлі двух падазраваных непадалёк. Сам робат ужо ляжаў у багажніку аўтамабіля Volkswagen. Паліцэйскія канфіскавалі яго разам з мабільнымі тэлефонамі абодвух маладых людзей.
Робат выглядаў даволі экстравагантна: чырвона-залацісты корпус, белая майка, сонцаахоўныя акуляры, накладныя вусы і ланцуг пад золата. Падобныя чалавекападобныя робаты каштуюць ад 5 да 9 тысяч даляраў.
Як піша Associated Press, у інтэрнэце распаўсюдзіліся відэазапісы, на якіх відаць, як двое маладых людзей суправаджаюць робата да групы дзяўчат. Ён дакранаецца да адной з іх і абдымае іншых. Пасля непрыстойных рухаў адзін з хлопцаў спрабуе адцягнуць робата, а людзі навокал смяюцца.
Прадстаўнік паліцыі Кёльна у каментары Associated Press заявіў, што праваахоўнікі ніколі раней не сутыкаліся з падобнымі здарэннямі. Паводле яго слоў, гэта абсалютна новая для паліцыі сітуацыя. Двум юнакам пакуль не прад'яўленыя абвінавачванні, але яны лічацца падазраванымі.
Выпадак паставіў перад следчымі незвычайнае юрыдычнае пытанне: хто нясе адказнасць за сэксуальныя дамаганні, калі да чалавека дакранаецца робат?
Як тлумачаць нямецкія юрысты, робат у такой сітуацыі можа разглядацца як інструмент у руках чалавека. Таму тое, што дзяўчыны дакранулася машына, само па сабе не выключае адказнасці за сэксуальныя дамаганні.
Пакуль паліцыя расследуе здарэнне паводле падазрэння ў абразе сэксуальнага характару. Следчыя высвятляюць, як кіравалі робатам падчас інцыдэнту і ці былі яго рухі наўмысна арганізаваныя. Пры гэтым юрысты не выключаюць, што дзеянні падазраваных могуць кваліфікаваць і паводле іншых артыкулаў, у тым ліку аб сэксуальных дамаганнях.
-
Дарослыя ўсё часцей купляюць цацкі для сябе, а дзяцей нараджаюць усё менш. Што адбываецца?
-
Касаткі навучыліся паляваць на вялікіх белых акул і здабываць іх печань. Навукоўцы занепакоеныя наступствамі
-
Прылукі пад Мінскам на хвалі хайпу — беларусы масава паехалі туды па здымкі ў стылі «Прыцемак». Мясцовыя не ў захапленні
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка4
Каментары