Пад ціскам грамадскасці Трамп адмяніў жывую трансляцыю расстрэлу злачынцы, асуджанага да смяротнага пакарання
Дональд Трамп 15 кастрычніка заявіў, што пакаранне смерцю Нідаля Хасана, асуджанага за страляніну на амерыканскай вайсковай базе Форт-Гуд у 2009 годзе, не будуць трансляваць у жывым эфіры. Такім чынам, прэзідэнт ЗША адмяніў рашэнне Пентагона, абвешчанае тыднем раней, паведамляе CNN.
Расстрэл Хасана, як і планавалася, павінен адбыцца 3 снежня. Убачыць пакаранне змогуць толькі найбліжэйшыя сваякі загінулых.
Трамп патлумачыў, што публічная трансляцыя магла б прадэманстраваць усяму свету, як ЗША абыходзяцца з тэрарыстамі, і стаць для іх перасцярогай. Аднак, па словах амерыканскага прэзідэнта, многія людзі не хацелі б бачыць смерць Хасана ні ў жывым эфіры, ні ў іншым фармаце.
Пра намер паказаць пакаранне ўсім ахвотным на мінулым тыдні паведаміў кіраўнік Пентагона Піт Хегсет. Паводле крыніц CNN, Трамп нібыта загадзя не ведаў пра гэтую заяву і спачатку не меў выразнай пазіцыі наконт трансляцыі. Пры гэтым ён, як паведамляецца, рашуча падтрымлівае само рашэнне пакараць Хасана смерцю праз расстрэл.
Адмены трансляцыі патрабавалі палітыкі абедзвюх вядучых партый ЗША і рэлігійныя лідары. Напярэдадні 72 былыя высокапастаўленыя прадстаўнікі амерыканскіх узброеных сіл, у тым ліку 45 генералаў і 12 адміралаў, выступілі з адкрытым лістом. Яны не пярэчылі супраць самога пакарання смерцю, але назвалі публічную трансляцыю «варварскім злоўжываннем уладай».
На іх думку, паказ расстрэлу парушыў бы канстытуцыйную забарону жорсткіх пакаранняў і мог бы ператварыць Хасана ў пакутніка ў вачах праціўнікаў ЗША.
5 лістапада 2009 года вайсковы псіхіятр, маёр Нідаль Хасан адкрыў агонь на базе Форт-Гуд у Тэхасе. Ён забіў 13 чалавек і параніў больш за 30. Гэта быў самы крывавы напад на амерыканскую вайсковую базу па-за зонай баявых дзеянняў. Падчас суда Хасан заявіў, што абараняў мусульман і талібаў у Афганістане ад амерыканскіх вайскоўцаў. Самога нападніка паранілі, і з таго часу ён перасоўваецца ў інвалідным вазку.
У 2013 годзе вайсковы суд прысудзіў Хасана да смяротнага пакарання. У пачатку кастрычніка 2026 года Трамп ухваліў выкананне прысуду праз расстрэл.
Калі прысуд будзе выкананы, гэта стане першым пакараннем смерцю ў амерыканскай вайсковай сістэме больш як за 60 гадоў. Апошні раз такое пакаранне прывялі ў выкананне ў 1961 годзе: тады павесілі радавога Джона Бенета, асуджанага за згвалтаванне 11‑гадовай дзяўчынкі.
Цяпер чытаюць
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам2
Масквічка распавяла, як разам з жаніхом ледзь не загінула ў аварыі па дарозе на сваё вяселле ў сядзібе пад Лагойскам
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары