Трагедыя з 30‑гадовай доктаркай са Старобіна — пайшла выдаляць зуб мудрасці і памерла
Яшчэ нядаўна Валерыя Баброўнік прасіла параіць добрага стаматолага, каб выдаліць зуб мудрасці. У выніку гэтая маніпуляцыя прывяла да смерці маладой жанчыны.
Валерыі Баброўнік было 30 гадоў, яна працавала намесніцай загадчыка па медыцынскай частцы Старобінскай гарадской бальніцы і спрабавала раскручваць лайф-стайл блог у інстаграме.
Напрыканцы верасня доктарка-блогерка шукала парады ў Threads — яна прасіла параіць добрага стаматолага, які здольны зрабіць складанае выдаленне зуба мудрасці: «Вельмі хвалююся, стаматолагі ў маім горадзе адмовіліся выдаляць, бо трэба пілаваць костку (корань пайшоў у костку)».
У выніку Валерыя паехала ў Мінск у прыватную клініку «Стамарус», дзе ёсць паслуга лячэння зубоў у сне.
На сайце клінікі пазначана, што для агульнай анестэзіі тут выкарыстоўваюць два прэпараты — «Севафлуран» (газападобны анестэтык) і «Прапафол» (унутрывенны прэпарат).
Яны абодва шырока выкарыстоўваюцца ў хірургіі — для здаровага 30‑гадовага чалавека рызыка памерці ад такой анестэзіі вельмі нізкая (гаворка ідзе пра адзінкавыя выпадкі на сотні тысяч наркозаў).
Але ў рэдкіх выпадках магчымыя спыненне дыхання, цяжкія парушэнні сардэчнага рытму або спыненне сэрца, моцная алергічная рэакцыя, траплянне змесціва страўніка ў лёгкія.
Валерыя не прачнулася пасля наркозу. Што дакладна здарылася, пакуль невядома. Імаверна, гаворка ідзе аб праблемах з сэрцам, якія ўзніклі нечакана.
Развітанне з ёй адбудзецца заўтра ў Мікашэвічах.
У Валерыі засталіся муж і сын, які вучыцца ў другім класе.
Усяго тыдзень таму яна радавалася, калі сустракала хлопца са школы: «Быць мамай — гэта пражываць яшчэ адзін шчаслівы дзень, забіраючы дзіця са школы, гледзячы, як ён ляціць да цябе абняцца, а потым разам па дарозе дадому акунуцца ў дзяцінства і гуляць».
Каментары