Марцін Скарсэзэ — «Захавальнік часу»
Амаль казачная гісторыя пра хлопчыка, які жыве ў гадзінніку.
ЗША, 2011, каляровы, 126 хв, 3D
Рэжысёр: Марцін Скарсэзэ
Ролі выконваюць: Аса Батэрфілд, Хлоя Морэц, Бен Кінгслі, Джуд Лоў, Саша Барон Коэн, Крыстафэр Лі, Хелен МакГроры
Жанр: Меладрама для ўсёй сям’і з элементамі кінаманскіх фантазій
Адзнака: 4,5 (з 10)
У 30-ыя гады маленькі Х’юга жыве на вакзале й даглядае гадзіннікі па загадзе дзядзькі-п’яніцы. Х’юга прагне адрамантаваць робата, якога адшукаў ягоны бацька перад трагічнай смерцю.
Каб здабыць дэталі хлопчык абкрадае старога гандляра цацкамі, у якога нейкія таямніцы.Таямніцы здзівяць героя.
У аб’ёмнай карціне Марціна Скарсэзэ — неверагодныя гадзіннікавыя механізмы, сняжынкі, што ляцяць у твар, цягнікі — якія імчацца на публіку. Густоўна падабраныя акцёры на эпізадычныя ролі разыгрываюць амаль казачную навагоднюю гісторыю: добры бацька Джуд Лоў вучыць сына, трагікамічны ваяка з жалезнай нагой — у нечаканым выкананні Сашы Барона Коэна — пераследуе хлопчыка, стары бібліятэкар (90-гадовы Крыстафэр Лі) загадкава ўсміхаецца. (На тле майстроў галоўны герой выглядае ледзьве не механічнаю лялькай).
Але самыя вялікія загадкі стужкі звязаныя з гісторыяй кіно.Гандляр цацак ніхто іншы, як маг адмысловых эфектаў Жорж Мяльес, які, сапраўды, гандляваў на вакзале. Цукерна-прадказальныя (і не вельмі цікавыя) прыгоды маленькага хлопчыка прыхільна прымае публіка, але здзіўленне выклікаюць урыўкі старых карцінаў, зробленыя аб’ёмнымі.
Цяпер чытаюць
Музыка, маляванне і танцы ў школах і гімназіях — усё? Што вядома пра скарачэнні настаўнікаў-эстэтыстаў9
Каментары