У Мінск прыязджае дзяржсакратар Ватыкана — які здолеў памірыць Кубу і ЗША, але не здолеў вярнуць Венесуэлу да дэмакратыі
Увага да візіту П'етра Параліна ёсць не толькі ў касцёле, але і палітычная.
П'етра Паралін возьме ўдзел у шэрагу сустрэч на самым высокім узроўні і ўзначаліць святую імшу.
Сёння пачынаецца афіцыйны візіт у Беларусь кардынала П’етра Пароліна, Дзяржаўнага сакратара Папы Францішка. Кардынал будзе знаходзіцца ў Беларусі па 15 сакавіка, паведамляе сайт catholic.by.
Дзяржсакратар — гэта кіраўнік дыпламатыі Ватыкана.
Дзяржсакратар асвяціць першы камень новага будынка Апостальскай Нунцыятуры ў Мінску, возьме ўдзел у шэрагу сустрэч на самым высокім узроўні. Таксама кардынал П’етра Паролін наведае міждыяцэзіяльнае начное чуванне моладзі, якое пройдзе 14—15 сакавіка ў мінскім касцёле Святых Сымона і Алены.
15 сакавіка кардынал узначаліць святую Імшу з удзелам дзяцей у мінскім архікатэдральным касцёле Імя Найсвяцейшай Панны Марыі.
П'етра Паралін быў пасярэднікам у перамовах ЗША і Кубы, якія прывялі да аднаўлення дыпламатычных адносін між дзвюма краінамі. Ён таксама рабіў спробу пасярэдніцтва на перамовах між Нікаласам Мадура і венесуэльскай апазіцыяй, якія выніку не далі.