Японскі кампазітар зладзіць «Сайлент Хіл» у Re:Public
Акіра Ямаока і яго гурт прыедуць ў Мінск з праграмай «Welcome to Silent Hill».
Akira Yamaoka Band выступіць у мінскім клубе Re:Public 19 лістапада. Аўтар музыкі да гульняў і кінаадаптацый «Silent Hill» можа прадэманстраваць слухачам і хард-рок, і трып-хоп.
Разам з кампазітарам і мультыінструменталістам Акірам Ямаокам ў Мінску выступіць жывы гурт, у тым ліку спявачка Мэры Элізабэт МакГлін, чый голас чулі гульцы і гледачы «Сайлент Хіла».
Квіткі на канцэрт ужо з’явіліся ў продажы ў інтэрнэце па цане ад 400 тысяч.
Сцвярджаецца, што выступ мае ўразіць не толькі фанатаў відэагульняў, але і ўсіх аматараў эксперыментальнай музыкі.
***
Акіра Ямаока пачаў працаваць штатным кампазітарам у распрацоўшчыкаў відэагульняў Konami ў 1993 годзе, пісаў музыку для практычна ўсіх гульняў серыі Silent Hill (з трэцяй часткі стаў прадзюсарам серыі), а таксама да некаторых іншых гульняў кампаніі, быў кампазітарам абедзвюх экранізацый. Яго музыка набыла папулярнасць па-за межамі асяроддзя фанатаў «Сайлент Хіла».