29 студзеня — адкрыццё выставы «Цела як літара» мастака Кахабера Гагохія
Кнігарня «Галіяфы» (Старавіленская, 6, Траецкае прадмесце). 17.00.
Кожная рэч сваім узнікненнем абавязаная няўлоўнаму імпульсу, што прысутнічае і падчас усяго творчага працэсу: імпульсу, які з'яўляецца, адпаведна, галоўным стрыжнем твора.
Аўтар пададзеных прац хацеў бы падзяліцца асабістым вопытам, у прыватнасці, вопытам узнікнення скульптурных кампазіцый. А глядач, у сваю чаргу, можа стаць саўдзельнікам гэтага працэсу, прасочваючы эвалюцыю формы ад ліній да аб'ёмнай пластыкі. Паколькі сувязь гэтая відавочная, хацелася б спыніцца на ўзнікненні лініі, якая нагадвае грузінскую каліграфію.
Метад вядзення працы ў мастака абсалютна інтуітыўны і спантанны, незалежны ад папярэдніх пошукаў. Калі прыглядзецца да грузінскай каліграфіі, можна заўважыць нейкае падабенства з гнуткімі і плыўнымі рухамі жаночага цела. У свядомасці мастака зліліся разам субстанцыі зусім розныя, але яны асацыятыўна пераклікаюцца паміж сабой і ўтвараюць тым самым завершаную і ўдасканаленую форму: ад пластыкі літары і пластыкі лініі — да пластыкі чалавечага цела.