Міністр Луцкі: Пазаўчора ён вёў вяселлі, сёння — карпаратыў, а заўтра — ён палітычны дысідэнт са статусам тэлевядучага
Пра гэта заявіў міністр інфармацыі Ігар Луцкі на сустрэчы Аляксандра Лукашэнкі з прадстаўнікамі дзяржаўных СМІ, піша БелТА.
На думку міністра, тэлеканалам трэба сыходзіць ад стварэння забаўляльнага кантэнту ўласнымі сіламі. Правільней выступаць заказчыкамі гэтага прадукту. А выканаўцамі павінны быць спецыялізаваныя творчыя майстэрні, прадакшн-студыі, «і тады не прыйдзецца, дарэчы, нам чырванець за ўсякага роду шоўменаў, якія сёння ў грамадстве неапраўдана пазіцыянуюць сябе як журналісты дзяржтэлебачання, што перакаваліся або раптам празрэлі. Пазаўчора ён вёў вяселлі, учора латарэйны розыгрыш, сёння — карпаратыў у рэстаране, а заўтра ён палітычны дысідэнт са статусам тэлевядучага дзяржканала. Давайце ад гэтага пазбаўляцца», — звярнуў увагу міністр.