БЧБ-нявесту Іну Зайцаву не выпусцілі з гродзенскага ізалятара. Справу адправілі на дапрацоўку
hrodna.life
Справа мінчанкі Іны Зайцавай 2 лістапада адправілі на дапрацоўку. Да суду яна застанецца ў ізалятары часовага ўтрымання (ІЧУ) ў Гродне. Пра гэта Hrodna.life распавёў яе муж Андрэй.
«Іна — адзіная дзяўчына, якая засталася пасля выхадных у Гродзенскім ІЧУ. Адвакат не сустракаўся з ёй, бо не было яшчэ працэсу. Што ёй інкрымінуюць мы не ведаем, мне нічога не кажуць. Гуляюць у сакрэцікі», — распавёў Андрэй Зайцаў.
31 кастрычніка Іна прыехала ў Гродна падтрымаць пратэстоўцаў і звольненых супрацоўнікаў «Азота». Яе затрымалі супрацоўнікі міліцыі, калі яна вярталася ў сталіцу.