Сайт, сацсеткі і ўсе матэрыялы Tut.by хочуць прызнаць экстрэмісцкімі — пачаўся закрыты суд
24 чэрвеня ў судзе Цэнтральнага раёна Мінска пачалася чарговая «справа Tut.by». На гэты раз МУС хоча, каб сайт, сацсеткі і ўсе матэрыялы партала прызналі экстрэмісцкімі.
Разглядае справу суддзя Таццяна Скапец.
Прадстаўнік МУС падаў хадайніцтва, каб працэс зрабілі закрытым. Чаму? Бо ў матэрыялах справе маецца заключэнне Рэспубліканскай экспертнай камісіі па ацэнцы інфармацыйнай прадукцыі на прадмет наяўнасці (адсутнасці) ў ёй прыкмет праявы экстрэмізму.
Каб не дапусціць агалошвання звестак з заключэння, МУC і просіць працэс закрыць. Што і было зроблена.
Нават не выходзячы з кабінета, суддзя Скапец хадайніцтва падтрымала.