Гісторыя прадажнага кахання
Пад маскай эратычнай камедыі «Бабнік» з Эштанам Катчэрам — захапляльная драма.
Прыгажун Нікі (Катчэр) карыстаецца нязменнай увагай жанчынаў. За кошт жанчынаў ён і жыве, пры гэтым не адмаўляецца ад дадатковых прыгодаў па-за межамі сваёй асноўнае працы. Аднойчы Нікі сустракае Хізэр — непрыступную аферыстку, якая шукае багатых дзядзяў. Родныя душы проста створаныя адна для адной.
Карціна «Бабнік», якая рэкламуецца ў нас як эратычная камедыя — драма з сумным фіналам, якая рэжа праўду-матку пра галівудскія штампы й галівудскія мары. Але ў гэтым фільме пра прадажнае каханне — досыць аголенага жаночага цела, лос-анджэлескага гламура і філейных частак Эштана Катчэра, які выступіў прадусарам стужкі.
Гэтыя складнікі мусяць задаволіць чыпсаедаў і дамачак бальзакаўскага веку. Маюцца і неабходныя камедыйныя моманты.
Але пасыл стужкі іншы.
Пекната, як тавар на продаж; юрлівасць — як тое, што пераўтварае чалавека ў рэч; мары — якія падманваюць.
І фільм варта глядзець дзеля апошніх 10 хвілінаў. Эштан Катчэр — усё-такі актор, а не проста «Бабнік».