68-гадовы палітвязень Мікалай Віцікаў выйшаў на волю. Яго затрымалі за крытыку паправак у Канстытуцыю
Пераслед 68-гадовага пенсіянера пачаўся пасля таго, як Віцікаў напісаў у рэдакцыю раённай газеты «Маяк» ліст з крытыкай паправак у Канстытуцыю РБ.
6 студзеня ў яго адбыўся ператрус — шукалі б-ч-б-сімволіку, падпіскі на пратэсныя каналы, але нічога не знайшлі.
14 студзеня Віцікаў быў затрыманы і змешчаны пад варту як падазраваны паводле ч. 1 арт. 130 КК РБ (распальванне расавай, нацыянальнай, рэлігійнай альбо іншай сацыяльнай варожасці). Пазней справа была перакваліфікаваная па артыкуле 369-1 КК — дыскрэдытацыя РБ.
7 чэрвеня суд Навабеліцкага раёна Гомеля (суддзя Аляксандр Зінчук) вынес прысуд: «8 месяцаў пазбаўлення волі ў калоніі агульнага рэжыму за «замах на распаўсюджванне недакладнай, абразлівай інфармацыі пра дзейнасць дзяржорганаў…»
Віцікаву тэрмін пакарання быў пералічаны з улікам перазаліку дзён, праведзеных у СІЗА, і скончыўся 28 чэрвеня.