«Настолькі забранзавеў». Бондарава напісала ў пракуратуру на Марзалюка
Інфаказачка з Гродна Вольга Бондарава напісала заяву ў Генеральную пракуратуру. Яна патрабуе правесці праверку ў дачыненні да дэпутата і гісторыка Ігара Марзалюка. «Спрыяе распальванню варожасці і нянавісці», — абурылася яна выказванню Марзалюка ў эфіры СТБ пра пазітыўную дыскрымінацыю на карысць беларускай мовы
«На рэпліку вядоўцы пра «незадаволеных блогераў» Марзалюк адказаў, што яму «начхаць». Гэта значыць, дэпутату напляваць на меркаванне грамадзян і яго выбаршчыкаў. Як жа гэта стасуецца з дэпутацкай этыкай? Або Ігар Марзалюк настолькі забранзавеў, што можа сабе дазволіць па-хамску ставіцца да грамадзян Рэспублікі Беларусь?» — піша Бондарава ў звароце.
Яна дадае, што ўкраінскія падзеі нічому Марзалюка не навучылі.
«Каб пазбегнуць сумнай долі Украіны і не стаць ахвярамі грамадзянскай вайны, просім даць прававую ацэнку выказванням Марзалюка на прадмет распальвання моўнай варожасці і абараніць беларускае грамадства ад магчымых падобных выпадаў супраць адной з дзяржаўных моў у будучыні», — гаворыцца ў заяве Бондаравай.