Заўсёднік прэс-канферэнцый Герман Напольскі ажаніўся на возеры Байкал
Беларускі журналіст Герман Напольскі ажаніўся. Цырымонія праходзіла на лёдзе расійскага возера Байкал, піша «КП» са спасылкай на іркуцкае тэлебачанне.
Скрыншот сюжэта іркуцкага ТБ
Герман Напольскі з Мінска і Надзея Савельева з Іркуцка пазнаёміліся ў Віцебску. Верагодна, на «Славянскім базары», дзе пастаянна працуе журналіст.
Заключыць шлюб на лёдзе Байкала наважыліся адразу 32 пары. Гэта быў першы досвед масавай рэгістрацыі ў гэтых краях. Дату выбралі люстраную — 23.02.2023. Усе пары замест туфляў абулі унты.
Напольскі падзяліўся ўражаннямі ад цырымоніі:
«У маіх краях, дзе я жыву, ніхто такога не рабіў. Хочацца здзівіць землякоў».
Надзея Савельева расказала пра заручальныя пярсцёнкі:
«У мяне гэта шкло. Яно сімвалізуе, з аднаго боку, кропелькі вады і галамянку. Паглядзіце, ёсць спалучэнне рыбкі. А Герману мы прапанавалі зрабіць пярсцёнак з нефрыту».
Вяселле згулялі ў дзень нараджэння Германа Напольскага.
Герман — вядомы персанаж у журналісцкіх колах. На прэс-канферэнцыях (ён хадзіў практычна на ўсе, незалежна ад тэмы) ён часта прадстаўляў нікому не вядомыя еўразійскія выданні і задаваў абсурдныя пытанні.