Памёр яшчэ адзін пацярпелы ў аварыі пад Смалявічамі
Сёння ўжо паведамлялася, што ад атрыманых траўмаў памёр кіроўца маршруткі, якая 20 лютага сутыкнулася ў Смалявіцкім раёне з грузавіком МАЗ, у выніку чаго на месцы загінулі 11 чалавек. Аказалася, што гэтая смерць была не апошняя, бо Мінздароўя паведаміла пра смерць яшчэ аднаго пасажыра той маршруткі.
Такім чынам, агульная колькасць ахвяраў той трагедыі ўжо дасягнула 13 чалавек.
Усяго пасля аварыі ў бальніцы Мінскай вобласці і сталіцы былі ў вельмі цяжкім стане шпіталізаваныя 9 пацыентаў. Ва ўсіх пацярпелых былі дыягнаставаныя спалучаныя траўмы, кансіліумы і паэтапныя аперацыі праходзілі з удзелам спецыялістаў рознага ўзроўню.
За выратаванне жыцця сямі пацярпелых дагэтуль вядзецца змаганне.