Лукашэнка 12 сакавіка адправіцца з візітам у Іран
12-13 сакавіка Лукашэнка плануе выправіцца з афіцыйным візітам у Іран, паведаміла БелТА.
У Тэгеране Лукашэнка плануе сустрэцца з вярхоўным лідарам Ірана Алі Хаменеі, прэзідэнтам Ірана Эбрахімам Раісі, першым віцэ-прэзідэнтам Махамадам Мохберам, старшынёй сходу ісламскай рады Махамадам-Багерам Галібафам.
Галоўнай тэмай перамоў называецца развіццё ўзаемадзеяння па ўсім спектры двухбаковых адносін з акцэнтам на гандлёва-эканамічным супрацоўніцтве. Але асобная ўвага будзе нададзена сітуацыі ў рэгіёне і свеце ў цэлым. Чакаецца падпісанне шэрагу міжнародных дакументаў.
У гэтым годзе Лукашэнка, які з 2020 года амаль нікуды не выязджаў, акрамя толькі Расіі і краін СНД, рэзка павялічыў сваю міжнародную актыўнасць. Гэты візіт за межы былога СССР з пачатку года для яго ўжо трэці: спачатку з 25 студзеня па 4 лютага ён ездзіў у ААЭ і Зімбабвэ, а з 28 лютага па 2 сакавіка наведаў Кітай.