ЗША дыстанцыйна выдалілі сакрэтную інфармацыю з беспілотніка, які ўпаў у Чорным моры
Злучаныя Штаты паспелі выдаліць сакрэтнае праграмнае забеспячэнне з беспілотніка MQ-9 Reaper перад тым, як ён упаў у Чорнае мора. Гэта зроблена, каб не дапусціць атрымання Расіяй сакрэтнай інфармацыі, паведамілі тэлеканалу CNN два амерыканскія чыноўнікі на ўмовах ананімнасці.
Фота ілюстрацыйнае
Дыстанцыйнае выдаленне праграмнага забеспячэння беспілотніка было зроблена пасля яго сутыкнення з двума расійскімі знішчальнікамі Су-27 14 сакавіка.
Са слоў аднаго з суразмоўцаў CNN, сутыкненне адбылося прыкладна за 72 кіламетры на паўднёвы захад ад Крымскага паўвострава. А ўпаў амерыканскі дрон прыкладна за 112 кіламетраў на паўднёвы захад ад Крыма.
Паводле версіі амерыканскага боку, расійскія самалёты скінулі авіяцыйнае паліва на MQ-9, пасля чаго адзін з іх сутыкнуўся з беспілотнікам, пашкодзіўшы яго прапелер.
Сакратар Рады бяспекі Расіі Мікалай Патрушаў раней заявіў, што РФ паспрабуе знайсці абломкі беспілотніка.
Чытайце таксама:
Ці прывядзе збіццё амерыканскага беспілотніка над Чорным морам да прамой вайны паміж Расіяй і ЗША?
ЗША зрабілі захады, каб збіты беспілотнік не трапіў у чужыя рукі