З гэтай краіны нечакана немагчыма адправіць лісты ў Беларусь
«Белпошце» ўдалося перабудаваць лагістыку, якая парушылася з-за санкцый, але з некаторымі дзяржавамі паштовага злучэння няма.
Цяпер ліста ад Санта-Клаўса, які жыве ў Раваніемі (Фінляндыя), не атрымаеш
З Беларусі цяпер нельга адправіць лісты ў Фінляндыю і ва Украіну, паведаміла журналістам гендырэктарка «Белпошты» Святлана Юркевіч, піша «Спутнік».
Таксама з гэтых краін у Беларусь не ідзе карэспандэнцыя.
«ЗША часткова… Мы туды адпраўляем, а да нас яны не прымаюць», — дадала Юркевіч.
Паводле яе слоў, раней санкцыі шэрагу краін стварылі праблемы для лагістыкі, але цяпер маршруты перабудаваныя. З-за гэтага некаторыя адпраўленні могуць ісці даўжэй. У тым ліку, так адбываецца праз замену авіяперавозак на аўтаперавозкі.
У 2020 годзе ў «Белпошты» былі часовыя цяжкасці з адпраўкай пасылак. Нейкі час яны прымаліся толькі для адрасатаў, якія знаходзяцца ў Кітаі ці Расіі. Былі такія праблемы і з лістамі. Асноўнай прычынай сталі збоі ў авіяперавозках на фоне пандэміі каранавіруса. Некаторыя напрамкі закрыліся цалкам.
А летам 2022 года паўсталі новыя праблемы пасля таго, як Асацыяцыя еўрапейскіх паштовых аператараў PostEurop прыпыніла членства як «Белпошты», так і «Пошты Расіі».
Асноўны беларускі паштовы аператар захаваў членства ў асноўнай галіновай структуры — Сусветным паштовым саюзе.
Разам з «Белпоштай», ліцэнзіі паштовых аператараў у краіне маюць яшчэ больш за два дзясяткі кампаній. Але самая вялікая сетка аддзяленняў цяпер у дзяржаператара.
Чытайце таксама: