Расійскія прапагандысты адмаўляюць эфектыўнасць ПВК «Вагнер» і важнасць Бахмута. Хоць раней лічылі інакш
У эфіры расійскага «Першага канала» паставілі пад сумнеў эфектыўнасць ПВК «Вагнер» і назвалі Бахмут «не самым важным, з пункту гледжання фронту», горадам, як заўважыла «Медуза».
У адным з сюжэтаў у выпуску перадачы «Чалавек і закон» ад 30 чэрвеня параўноўваюцца баі за Марыупаль і за Бахмут. Першы горад называюць «адным з найважнейшых цэнтраў украінскай металургіі», з якога «восем гадоў мэтанакіравана рабілі магутны ўмацаваны раён разам з «Азоўсталлю», якая лічылася непрыступнай, і вельмі матываваным батальёнам «Азоў». Адзначаецца, што насельніцтва горада складала 425 тысяч чалавек.
У сюжэце пералічваюцца падраздзяленні расійскай арміі, якія ўдзельнічалі ў бітве за Марыупаль, сярод якіх няма ПВК «Вагнер». Таксама дыктар адзначае, што горад быў захоплены за 71 дзень.
А вось «не самы важны, з пункту гледжання ўсяго фронту, Арцёмаўск» з насельніцтвам 72 тысячы чалавек «вагнераўцы» захоплівалі 224 дні. На заканчэнне сюжэту, праўда, гаворыцца, што ніхто «ніякім чынам не прымяншае подзвіг» байцоў ПВК «Вагнер», «якія сумленна і самааддана змагаліся».
Пры гэтым 21 мая, на наступны дзень пасля таго, як Яўген Прыгожын абвясціў пра захоп Бахмута, на «Першым канале» «вызваленне» горада назвалі «падзеяй гістарычнага маштабу».
Чытайце таксама: