Беларусь адрэагуе на новыя санкцыі ЕС пастрожваннем правіл імпарту заходніх тавараў
1.07.2024 / 17:15
Прэс-сакратар МЗС Анатоль Глаз заявіў, што Беларусь падрыхтавала меры ў адказ на новыя санкцыі ЕС.
Анатоль Глаз. Скрыншот АНТ
«Урадам ужо падрыхтаваны комплекс асіметрычных мер у адказ. Яны будуць звязаныя з узмацненнем жорсткасці ўмоў імпарту і дзейнасці ў Беларусі суб'ектаў з недружалюбных краін», — сказаў Анатоль. Глаз.
Ён таксама адзначыў, што, маўляў, для Мінска новыя абмежаванні ЕС — «зусім прахадны этап».
«У нас шмат планаў развіцця, актыўна працуе эканоміка і, шчыра кажучы, наперадзе вельмі шмат спраў і праектаў. На гэтым фоне спробы кіраўніцтва ЕС сваімі незаконнымі санкцыйнымі пакетамі спыніць наша развіццё выглядаюць трохі камічна», — сцвярджае прэс-сакратар МЗС.
На мінулым тыдні ЕС распаўсюдзіў на Мінск шэраг антырасійскіх санкцый. Яны закранаюць імпарт з Беларусі ў ЕС золата, алмазаў, гелію, вугалю і мінеральных прадуктаў, сырой нафты. Забаронены таксама транзіт праз Беларусь тавараў і тэхналогій падвойнага прызначэння.
Чытайце таксама:
ЕС пашырыў на Беларусь санкцыі, уведзеныя супраць Расіі
Краіны ЕС узгаднілі санкцыі ў дачыненні да Беларусі, каб закрыць самую вялікую шчыліну супраць Расіі
Аналітык назваў тры прычыны таго, чаму Украіна захоўвае дыпламатычныя адносіны з Беларуссю