Мясніковічу знайшлі новае прымяненне
30 ліпеня Лукашэнка сустрэўся з працоўнай групай па аналізе дзейнасці Нацыянальнай акадэміі навук. «Салідарнасць» звярнула ўвагу, што на гэтай нарадзе прысутнічаў і былы кіраўнік НАН ды прэм'ер-міністр 74-гадовы Міхаіл Мясніковіч, якога, як раней здавалася, ужо адправілі на пенсію.
Створаная працоўная група пад кіраўніцтвам старшыні Камітэта дзяржкантролю павінна падрыхтаваць Лукашэнку прапановы па развіцці Акадэміі навук. Мяркуючы па прысутнасці на сустрэчы Мясніковіча, ён уваходзіць у склад гэтай групы.
На нарадзе чыноўнік сядзеў бліжэй да краю стала, але менавіта ён пасля выйшаў да журналістаў дзяржаўных СМІ расказаць пра змест сустрэчы. Тыя прадставілі яго ў сваіх публікацыях як «дзяржаўнага дзеяча».
З 1990-х па 2010-я гады Міхаіл Мясніковіч быў адной з найзначнейшых фігур у атачэнні Лукашэнкі, узначальваючы ў розны час ягоную адміністрацыю, Акадэмію навук, урад і Савет Рэспублікі. Але ў апошнія некалькі гадоў Мясніковіч займаў не вельмі ўплывовую пасаду кіраўніка калегіі Еўразійскай эканамічнай камісіі, а ў пачатку гэтага года страціў і яе.
Чытайце таксама:
Чалы патлумачыў, чым быў карысны Мясніковіч у час працы з Лукашэнкам
Як складаліся лёсы былых кіраўнікоў Адміністрацыі Лукашэнкі
Мясніковіч пакідае пасаду старшыні ЕЭК
У прадмове двойчы цытуецца Пуцін і ні разу Лукашэнка — рэцэнзія на хаатычныя мемуары Мясніковіча