З'явілася рарытэтнае ВІДЭА пра тое, як галасавалі ў 1994-м
Апісанне да роліка не менш цікавае за само відэа.
Участак для галасавання. Фота: скрыншот з відэа на ютуб-канале «Виктор Гринкевич»
Відэа было апублікавана каля месяца таму (раней яго ўжо выкладалі на ютуб, але аўтар рашыў пераапублікаваць). У 11-хвілінным роліку сям’я з Беразіно ідзе галасаваць на выбарчы ўчастак №4, які месціўся ў гарадской школе №3.
Відэа пачынаецца са слоў жанчыны: «Прэзідэнта ідзем выбіраць». «Першага прэзідэнта рэспублікі», — дадае іншая. Галасаваць тады яны збіраліся за Лукашэнку.
Далей на відэа можна ўбачыць карціну, якую цяпер складана нават уявіць. Мужчына здымае на выбарчым участку ўсё, што трапляе яму на вока. У кадры члены выбарчай камісіі, сакратар і старшыня.
Старшыня і сакратар выбарчай камісіі
Бачна, як на сцяне вісіць дзяржаўны бел-чырвона-белы сцяг.
На заднім плане бачныя заштораныя кабінкі — на выбарах 2020 года і наступных шторы забаранілі
Пад відэа нечаканае апісанне. Аўтар разважае: хто мог ведаць, што ў людзей пасля 30 гадоў не будзе магчымасці абраць іншага прэзідэнта. Але яго занепакоенасць выклікае не падаўленне свабоды ў краіне, а тое, што «лёс насмяяўся з часткі рускага народу».
Аўтар не ў захапленні, што Беларусь стала незалежнай дзяржавай. Ён бядуе, што людзей пазбавілі «вялікай Радзімы» — Расіі.
«Масква — родны горад і сталіца — раптам для некаторых стала сталіцай «акупантаў» і «агрэсараў». Затым пазбавілі нацыянальнасці і ўсіх назвалі беларусамі, якія ні слова не ведаюць з гэтай дзіўнай мовы», — гаворыцца ў апісанні пад відэа.
Сярод іншага аўтар відэа адзначае, што нібыта большасць з тых, з кім ён размаўляе на гэтую тэму, чакаюць уз’яднання з Расіяй.
Адзін з каментатараў задаў яму пытанне:
«Вас Мірсалімава пакусала? Або Бондарава?»