У Мінску 9 мая збіраюцца правесці маштабны вайсковы парад
У мерапрыемстве плануецца ўдзел 24 парадных разлікаў і паветраных суднаў, расказаў памочнік міністра абароны па ідэалагічнай рабоце генерал-маёр Леанід Касінскі.
Фота ілюстрацыйнае
Вайсковы парад да 80-й гадавіны перамогі над нацысцкай Германіяй будзе тэматычна складацца з гістарычнай і сучаснай частак.
«Гістарычная частка будзе ўключаць у сябе праходжанне рознай рэтратэхнікі і парадных разлікаў у форме з узбраеннем ваенных гадоў. Па сутнасці, гістарычная частка будзе пабудаваная на асобных элементах парада Перамогі 1945 года ў Маскве. У складзе механізаванай калоны пройдуць легендарныя танкі Т-34. Упершыню на парадзе будуць прадстаўленыя знакамітыя тачанкі з кулямётамі», — удакладніў Касінскі.
Таксама ў парадзе будзе ўдзельнічаць сучасная тэхніка беларускай арміі: пачынаючы ад браняванай і заканчваючы ўзорамі тэхнікі сувязі і радыёэлектроннай барацьбы.
На парад у Мінску запрошаныя вайскоўцы з Расіі і Кітая, а таксама групы з дзяржаўнымі сцягамі краін СНД.