«Сталы для куні». Беларускі вытворца мэблі зрабіў правакацыйную рэкламу
«Пачакайце, дык ён для кухні? Адмяняйце замову», — пішуць у каментарыях.
Скрыншот відэа ў інстаграме
Каб прарэкламаваць мэблю ўласнай вытворчасці, беларуская кампанія Domus паспрабавала спекуляваць на тэме аральнага сэксу.
Правакацыйнае відэа фірма апублікавала на сваёй старонцы ў інстаграме. У ім жанчына, шырока рассунуўшы ногі, сядзіць на кухонным стале. Каля яе галавы бачны надпіс: «Сталы для куні». Калі аператар мяняе ракурс, тэкст змяняецца на «Сталы для кухні». Глядач бачыць, што паміж ног жанчыны сядзіць мужчына ў кепцы Domus, які нешта рамантуе.
Подпіс да відэа шматзначны: «Замаўляйце сталы для кухні і не толькі». Ролік стаў вірусным і набраў ужо амаль 6 мільёнаў праглядаў.
У каментарыях шмат жартуюць: нехта пытаецца, ці не патрэбны кампаніі новыя супрацоўнікі, нехта просіць пазначаць, якую вагу ўтрымлівае стол (і ўдакладняе, што хутка 8 Сакавіка).
Асуджальныя каментарыі таксама ёсць, але пазітыўных значна больш. Самы папулярны, які набраў больш за 35 тысяч лайкаў, гучыць так: «Дайце СММ-шчыку прэмію, калі ласка».
Чытайце таксама:
«Самы час адмыць грахі». Баранавіцкі завод парашкоў зрабіў сэксуальную калабарацыю
Як у школьныя электронныя дзённікі трапіла рэклама піва? З'явілася тлумачэнне