Прадстаўнікі Трампа таемна ўгаворвалі Зяленскага вярнуцца да перамоваў
Гэта адбывалася негалосна і ўжо пасля сваркі, якая адбылася паміж прэзідэнтамі ў Белым доме 28 лютага, піша CNN.
Фота: AP Photo / Mystyslav Chernov
Прадстаўнікі прэзідэнта ЗША Дональда Трампа правялі таемныя перамовы з прэзідэнтам Украіны Уладзімірам Зяленскім і ягонай камандай пасля пятнічнай сваркі ў Авальным кабінеце, каб «вярнуць перамовы ў патрэбнае рэчышча».
Як паведаміла CNN са спасылкай на ўласныя крыніцы, прадстаўнікі Трампа падкрэслілі важнасць стабілізацыі адносін як мага хутчэй і заклікалі аднавіць перамовы да выступу прэзідэнта ў Кангрэсе.
CNN адзначыла, што сярод тых, хто гаварыў з Зяленскім, быў спецпрадстаўнік Трампа па Украіне Кіт Келаг. Адзін з чыноўнікаў Белага дома паведаміў CNN, што пагадненне аб здабычы ўкраінскіх карысных выкапняў яшчэ не падпісанае. Аднак прадстаўнік Белага дома запэўніў, што адміністрацыя Трампа лічыць, што перамовы па гэтай угодзе «рухаюцца ў правільным кірунку».
Прадстаўнік каманды Трампа адзначыў, што прэзідэнт, які падчас прамовы закране тэму вайны ва Украіне, хоча абвясціць аб пагадненні адносна ўкраінскіх карысных выкапняў.