Стаў вядомы жорсткі прысуд, вынесены жыхару Гомеля за «здраду дзяржаве»
21.03.2025 / 23:43
У лютым 2025 года ў Гомельскім абласным судзе адбыўся разгляд крымінальнай справы па ч. 1 арт. 356 (здрада дзяржаве) Крымінальнага кодэкса. Прысуд гамельчуку Юрыю Залатухіну 25 лютага вынес суддзя Дзмітрый Казлоў, піша «Гомельская вясна».
Юрый Залатухін
Як цяпер стала вядома, Юрый Залатухін быў асуджаны на 9 гадоў пазбаўлення волі ва ўмовах узмоцненага рэжыму. У чым канкрэтна суддзя палічыў яго вінаватым, цяпер высвятляецца.
У той жа дзень праваабарончая супольнасць прызнала Юрыя Залатухіна палітзняволеным, паколькі судовы працэс быў закрыты, што выклікае сумненні ў яго аб’ектыўнасці. А 21 лютага, за чатыры дні да абвяшчэння прысуду, МУС уключыла Юрыя ў свой спіс «экстрэмістаў».
Вядома, што Залатухін быў затрыманы недзе ў канцы верасня мінулага года. Спачатку ён быў арыштаваны на 15 сутак па артыкуле 19.11 КаАП — распаўсюд «экстрэмісцкіх» матэрыялаў. Праз 15 сутак адбыўся яшчэ адзін працэс па гэтым жа артыкуле, а пасля Юрый, не выходзячы на волю, быў затрыманы па крымінальнай справе.
Па звестках праваабаронцаў, раней Юрый Залатухін працаваў на будоўлі, а ягоная жонка — украінка.
Чытайце таксама:
У Брэсце за ўдзел у пратэстах асудзілі вядомага лёгкаатлета
Стаў вядомы прысуд мытніку Скубілаву, абвінавачанаму ў «здрадзе дзяржаве»